Shillong, Nailur 11: U Lat ka Jylla Meghalaya u CH Vijayashankar ula pynthikna ba ka Sorkar Jylla kan ai ka jingkyrshan kaba pura ia ka Border Security Force (BSF) ha kaban pynkhlain ban ai jingiada ha ki khappud jong ka ri India bad Bangladesh.
Kane ka jingai jingkular kala mih ha ka por, ba u Director General u BSF u Praveen Kumar ula leit iakynduh ia u Lat ka Jylla ha Lok Bhavan hynne ka sngi Thohdieng.
U Kumar ula batai ia u CH Vijayashankar ia ki sienjam bad ia ki lad kiba la shim da ki BSF ban iada bad ban ai jingshngain ia ki nongshong shnong ka Meghalaya bad Assam kiba sah ha ki khappud bad ka ri Bangladesh.
U Inspector General, Frontier Headquarters BSF Meghalaya, u OP Upadhyay bad Additional Chief Secretary jong u Lat u HC Chaudhary kila don lang ha katei ka jingiakynduh.
“U DG ula batai bniah ia u Lat halor kiba bun ki lad bad ki sienjam kiba la shim da ki BSF ban iada bad ai jingshngain ha ki thain khappud jong ka ri India bad Bangladesh. Ka jingiakren kala kynthup ruh ia ki kam kiba la leh da ki BSF ha kaban peitngor bha ha khappud bad ban shimkhia ia ki jingeh ha ki thain khappud” la pynpaw ha ka kyrwoh khubor.
Kila iathuh ruh, ba u Lat ka Jylla ula ai jingiaroh ia ka jingshimkhia jong ki shipai BSF.
“U Lat ula ai jingiaroh ia ki jingshimkhia jong ka BSF ha kaban iada ia ka thain khappud bad ula pynthikna ba ka Sorkar Jylla kan ai ia ka jingkyrshan kaba pura ia ki” kila bynrap.
Kane ka jingialang kala iengskhem ba kan don ka jingiadei kaba iajan bha hapdeng ki BSF bad ka Sorkar Jylla ban pynthikna ba kan don ka jingpyrkhing bad ka rukom treikam kaba janai ha ki thain khappud.
