Shillong, Nailur 10 : Ka Sorkar Pdeng kala ai ia ka jubab kaba sngewtynnad ia ka jingkyntur jong ka Sorkar Meghalaya halor ka kam tih dewiong da ka jingstad saian bad ka kynhun na Delhi ka lah ban wan sha Jylla ha u bnai Risaw ban khmih dala ki jong ki khmat la ka long ne em ban tih par da ka jingstad saian, ong ka MLA ka Sutnga-Saipung Kong Santa Mary Shylla ha ka sngi Palei.
Ka kong Santa ka iathuh ba ka Ministry of Mines ka Sorkar India kala pynlong ia ka jingialang ha Delhi bala pyniaid da u Additional Secretary ka Tnad Rupinder Brar, kaba la iashimbynta lang da ki Ophis ka Directorate of Mineral Resources ka Sorkar Meghalaya, u Secretary ka Tnad Ain Bah CVD Diengdoh bad ki nongmihkhmat ka CMPDIL.
“Ka jingialang ka long kaba sngewtynnad bha. Ki Ophisar jong ngi kila buddien halor ka kam tih dewiong da ka jingstad saian ha Meghalaya. Ngi la ai ka jingbatai bad ka CMPDIL ruh kala batai ia kaei kaba lah ban leh, khamtam ha East Jaintia Hills. Kila pyni ia ka jingsngewbha bad ki lah ban wan sha Meghalaya ban peit kumno ka rukom tih par ka iaid ha ki par” ong ka kong Santa haba iakren bad ki nongthoh khubor.
Ka iathuh ba kane ka jingialang ka dei kaba pynbud ia ka dorkhas bala aiti dang shen da ma ka lem bad u Myntri Rangbah Conrad K Sangma sha ka Sorkar Pdeng.
“Ha ka dorkhas, ngi la kdew ia bun tylli kimat, hynrei ka jingkyrpad ba hakhmat eh ka long ban pynduna ia ka jaka ba donkam ban tih par da ka jingstad saian. Ka Open-cast kam iahap satia ha Meghalaya namar ka bun ka jinglut bad kan lam sha ka jingjulor ka mariang. Nalor kata, ka jinglong trai jaka hangne hi ka dei ki riew shimet, kumta dei ban pyrkhat ia ka jingai licence sha ki riew shimet” kala ong.
Haba pynpaw ba ki paidbah jong ka Jylla, khamtam ha ki thain ba don ki par dewiong, kila mad ia ka jingeh ha ka pisa pilain namar ka jingkhang tih dewiong, ka kong Santa ka ong ba ka Sorkar kala trei shitom ban pynsdang biang ia ka jingtih dewiong bala teh da ki kyndon.
“Naduh u 2019, kane ka dei ka sien ba nyngkong ba ka Sorkar India kala pyni dak ba sngewtynnad. U Myntri Rangbah ula trei khlem thait miet la bad sngi na ka bynta ki paidbah bad iai kyntur shakhmat ia kane ka kam, bad ngi la kyrshan ia u ha baroh ki sienjam” kala ong haba bynrap ba ka Ministry kam pat buh satia ia ka tarik hynrei ki lah ban wan ha u bnai Risaw.
