Shillong, Nailur 10 : Hapdeng ki khubor ba 9 na ki 12 ngut ki MLA ki don jingthmu ban leit iasoh noh sha ka BJP, ka United Democratic Party (UDP) ha ka sngi Palei kala pynpaw ba ka jingkhang jong ka party ka long kaba plie beit ban iakren bad ka kloi ruh ban bujli nongialam lada donkam.
U General Secretary ka UDP Bah Titosstarwell Chyne ula ong ba ka party haduh mynta kam pat ioh satia ia kano kano ka khubor halor ka jingphet seng.
“Ym pat wan satia kano kano ka shithi ne ka jingai jingtip na kino kino ki MLA haduh mynta” ula ong.
U iathuh ba ki jingpyrshang jong u ban ioh ia ki jingshai na ki MLA kam pat seisoh satia haduh mynta.
“Nga la iakynduh bad phone ia ki la bunsien. Kim shym la kren shai satia. Kim shym la pynthikna lane kyntait ia ka jingthmu kynthih sha ka BJP” ong u Bah Titos.
Haba kylli hato dei ban kynnoh ia u President Bah Metbah Lyngdoh ba kine kiei kiei baroh kila wan jia, u Bah Titos ula ong “ka long kaba suk ban kynnoh. Lada ka don ka jingbym hun ia Nga lane ia u President, dei ban kren beit beit. Kine ki kam kim dei ki nongkynti shimet. Ka dei na ka bynta ka party. Lada ngi dei ka daw ba ki kwah ban mih seng, ngi long kiba kloi ban hiar shuki ban pynkhlain ia ka party”.
U iathuh ba ka UCP kan pynlong ia ka jingialang ba kyrkieh jong ka CEC ha ka sngi Thohdieng, kaba dei ruh ka sngi rakhe ia ka sngi seng ne foundation day.
“Ngi la khot ia baroh ki MLA, MDC bad ki dkhot ka CEC” ula ong.
Haba kylli la ka dei ka jingbujli shuki Myntri kaba pynmih ia kine ki kynrum kynram, u Bah Titos ula ong “Ngam tip ia kata. Kane ka dei shabar ka jingtip jong nga bad ka dei ka rai u Myntri Rangbah”.
