Shillong, Nailur 10 : Ki nongri sniang ha ryngkat bad la ki jong ki sniang kila iamih sha surok ha ka sngi Palei bad iaid paidbah na Lad Civil Hospital sha madan Malki ban pynpaw iala ki jingim na ka jinglynshop ka jingpang African Swine Flu (ASF) ha Jylla.
Ia kane ka rally la pynlong hapoh ka lama jong ka Hill Farmers Union.
Haba kren sha ki nongthoh khubor, u General Secretary ka Hill Farmers Union Alfonbirth Kharsyntiew ula ong ba ia ki nongri sniang la pynbor ba kin mih sha suro hadien ka jingpulom ki jingpyrshang ba bun sien ban iakynduh ia u Myntri Rangbah ka Jylla.
“Ka long kaba sngewsih ba wat hadien ka jingpan por la bunsien ban iakynduh na u Myntri bad ruh na u Myntri Rangbah ba ngin ioh buh ia ki mat jingdawa bad ban iathuh ha ki shaphang ki jingeh ba mad da ki nongri sniang, kim shym la ai satia ia ka por namar ba ki iabunkam. Ta ka daw ngi la kyrpad ia u Deputy Commissioner bad Superintendentof Police ba kin shah ia ngin ban ialum lang para nongri sniang khnang ba ngin lah ban pynpaw ia ki jingeh jong ngi haba iadei bad ka ASF kaba la ktah jur ia ki nongri sniang ha kylleng ka Jylla” ula ong.
U Bah Kharsyntiew ula ong ba ki nongri sniang kila kmen bha haba nyngkong haba ka Sorkar kala sdang pyntreikam ia ka Piggery Mission bad ki Cooperatives Society bad Producer Groups kila ioh ia ka jingiarap song pisa.
“Watla ka dei ka jingai ram ba khlem sut, kin hap ban siew pat ia ki. Ynda ka ASF kala lynshop, bun ki sniang kila iap bad ki longiing kila shem jingeh bha. Mynta kala long ka jingeh ia ki ban siew ia ka ram” ula ong.
Ula kynnoh ba ka jingbym pyntreikam ia ka SOP bala pynmih da ka Tnad Animal Husbandry & Veterinary ha ka 10 tarik Nailar 2023, kaba pynlong kongsan ban leh test ia ki sniang im ba wanrah nabar ka Jylla, kiba rung lyngba ki checkpost bala buh bad buh quarantine lada shem ba ki don jingpang.
“Ka don ka SOP bala pynthymmai kaba kren shai ha ka mat ba 5 ba kino kino ki sniang im ba wanrah nabar ka Jylla kin hap ban leh test bad rung lyngba ki checkpoint, bad lada shem ba ki don jingpang, dei ban set ia ki hapoh ki quarantine centre. Hynrei haba ki pyrshang ban wad ia kine ki checkpost ha baroh kawei ka ri-bhoi district, ngim shym la lap ban don kawei ruh. Ngi sngew namar ba ka Sorkar kam lah ban buh ia kine ki checkpost, kala wanrah ia ki jingpang khamtam ka African Swine Flu kaba la ktah jur ia ki sniang bad ki longiing jong ki nongri sniang” ula ong.
“Ngi la wanrah ia ki sniang im sha surok ban phah ia ka khubor sha ka Sorkar khnang ba kan sngap ia ngi. Lada donkam, ngi long kiba kloi ban iashong bad ki Ophisar bad ka Sorkar ban iakren halor kine ki jingeh” ula ong.
Haba batai ia ki jingdawa, u Bah Kharsyntiew ula ong “Ngi dawa ban buh ia ki checkpoint bad ki quarantine centre, map noh ia ki ram jong baroh ki nongioh bynta jong ka Piggery Mission, bad siew bai lutksan ia ki nongri sniang kiba la shim ia ka ram khamtam ban ri sniang”. Ka Union kala kyntu ruh ia ka Sorkar ban tuklar ha kaban pynsangeh ia ka jinglum khajna beain bad jingdawa pisa.
“Ngi kyrpad ia ka Sorkar ban pynmih ia ka jingpynbna lyngba ki Deputy Commissioner ba kin pynsangeh ia ka jinglum pisa jubor lane lum khajna beain da ki riew rynar, ia kaba ki Pulit ruh ki don bynta lang” ula ong.
Ula dawaruh ia ka agriculture policy kaba bniah bha jong ka Jylla. “Kawei na ki mat jingdawa ba hakhmat eh jon gngi ka dei ka Agriculture Policy. Ha u 2018, ngi la iakynduh ia u Myntri Rangbah bad ha ka dorkhas ba nyngkong eh jong ngi, ngi la dawa ia ka Agriculture Policy. Kala iaid phra snem mynta bad ngim shym la iohi dak eiei ruh em” ula ong.
Haba kylli halor ka jingktah jong ka jingpang ASF, ula ong “Kat kum ki jingkhein bala lum na ki shnong bapher bapher na baroh ki district, palat ia ka 1200 tyli ki longiing kila shah ktah ha ka ASF. Ngin sa nang lum ia ki jingtip ba bniah bad sa aiti sha ka Sorkar”.
