Shillong, Nailur 10: Ka Directorate of Revenue Intelligence (DRI) kala kurup haduh 14.68 kilo ka snep Kyrbei bala thad tyrkhong na kawei ka kali ha Ri-Bhoi District, kaba long kawei na ki hynriew tylli ki jingkhynra bala lehh ha kylleng ka ri India pyrshah ia ka jingkhaii ia ki mrad khlaw.
Kane ka jingkurup kala jia ha ka 7 tarik Nailur na kawei ka Bolero Truck kaba dang iaid shaphang ka thain Mawhati,Ri-Bhoi. Ia kine ki snep kyrbei la thep ha ki lai tylli ki pla.
Ia ki briew bad ka kali nalor ki snep kyrbei la aiti noh sha ka Ophis u Range Forest Officer, Nongpoh, ba kan leh ia ki jingdonkam kat kum ka ain Wildlife (Protection) Act, 1972.
Ka kyrbei ka dei ka mrad kaba la pynhap hapoh ka Schedule I jong ka Wildlife (Protection) Act bad la buh thup ia ka hapoh ka Appendix I jong ka CITES. Ka snep jong kane ka mrad ka dei kawei na ki mar ba pyniaid iew bha ha kylleng ka pyrthei khamtam ha ki ri ka dewbah Asia kiba ju pynkylla dawai tynrai.
Ha Karbi Anglong ruh, ki Ophisar ka DRI ha ka 28 tarik Nailar, kila ioh bat ia lai ngut ki brew ba shong ha kawei ka kali bad ioh kurup ia ka snep kyrbei ba khia kumba 9 kilo lame bad ka shyieng khla ba 500 gram, kynthup ia ka shynrong khlieh bad ka bniat.
Na kien ki hynriew tylli ki jingkhynra, ka DRI kala ioh kurup ia ki snieh leopard, 180 tylli ki dkar ba dang im, 12 tylli ki niang bashiah tokay geckos, kumba 24 kilo ki snieh kyrbei bad 500 gram ka shyieng khla.
Ka DRI kala ioh kem ruh haduh 13 ngut ki briew na kine ki jingkhynra baroh.
