Tura, Risaw 12 : Ki paid Garo ba shong shnong ha ki thain Goalpara District ka Assam, kila dawa ban ai da ka jingpynshitom ba tyngeh pyrshah ia ki runar kiba rahbor bad leh beijot ia kawei ka Khynnah Skul Garo kaba dei na kawei ka shnong Garo ha Goalpara District.
Kane ka Khynnah skul kaba pule ha ka skul Missionary hajan Paikan, Goalpara, kala shah rahbor katba ka dang wan phai na ka prokram jong ka skul ba long ha ka taiew bala lah.
Kane ka Khynnah kala leit ia shimbynta ha ka prokram deiriti (cultural) bad jingiathung dieng ha skul hynrei katba ka dang wan phai iing bad uwei u para klas lyngba ka khlaw Reserve Forest ba poi sha shnong Bolbola ha Paikan, lai ngut ki runar kila thombor ia ki.
Kine ki lai ngut ki runar kiba dei na ki jaidbynriew rit paid, kila shoh ia une u khynnah haduh da u iapler bad bret ia u ha kawei ka nala shuwa ba kin rahbor ia kane ka khynnah sha ka jaka ba kynjah bad leh beijot.
Une u Khynnah mar syn kyndit bynriew, ula pyntip mar mar sha ki trai shnong ka thain, kaba lam sha ka jingioh pyllait ia kane ka khynnah.
Halor kane ka jingjia, ki trai shnong kila iamih ban pynlong ia ka rally bad dawa ban ai ka jingpynsajia ba tyngeh ia kine ki lai ngut ki runar.
Ki Khynnah skul, ki nonghikai bad ki riew rangbah nalor ki nongshongshnong kila iamih paidbah hynnin ka sngi ba-ar ryngkat ka jingpyrta slogan, rah banner bad placard ba pynrem jur ia kane ka kam bymman bad ban dawa ai jingbishar ba hok ia kane ka khynnah.
