Shillong, Nailur 09 : U Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Balang ula kular ba ka Sorkar kan sa tuklar hi lada ki Chief Secretary ka Jylla Meghalaya-Assam kim lah ban pynbeit ia ka jingwan lum khana samari ka Assam ha ka thain Langpih, West Khasi Hills.
U Bah Prestone ula pynpaw ia kane hadien ka jingiakynduh bad ka kynhun ba ialam da u MDC ka Rambrai-Jyrngam, kiba wan ujor ia ka jingshah pyndik bad jingwan lum khana samari jubor ha ki shnong Khasi kiba don hapoh ka thain.
“Nga la dep bthah ia u Chief Secretary ban iakren halor kane ka kam bad u Chief Secretary ka Assam, kumba ju leh baroh shikatta. Lada jia ba kine ki arngut ki Heh Ophisar kim lah ban leh eiei, ngin sa tuklar hi da ka Sorkar” ong u Bah Prestone.
U ong ba ia kane ka kam yn sa nang pynheh lada donkam.
“Kawei pat ka kyrdan kan dei hapdeng para Myntri Sorkar bad hadien para Myntri Rangbah. Nga la dep ban ai jingbthah. Nga sngewthuh ia ka jingeh bala mad da ki briew jong ngi ha ka thain Langpih” ula ong.
Halor ka jingdawa ka kynhun ban buh ia ka ktem pulit ba shipor ne outpost ka ban ai jingiada ia ki nongshongshnong, u Bah Prestone ula ong ba ka Sorkar kan sa shong bishar ia kane ka jingtyrwa.
“Kila pan ia ka ktem pulit ba shipor lane outpost ba shipor. Ngin sa shong bishar ia ka. Ngi la don lypa artylli ki BOP, kawei ka Langpih bad kawei kham pajih ia ka Langpih. Nga la bthah ia u Chief Secretary bad DGP ba kin khmih ia kane” ula bynrap.
