Shillong, Nailur 9: Ki ophisar ka Sorkar Assam kila pynthikna ban ai jaka pynieng kali na ka bynta ki Tourist Taxi ka Meghalaya ha Guwahati Airport bad Railway Station bad kila pan por 15 sngi ban weng noh ia ki ‘Middlemen’ ne kiba treikam ha Khanapara, Paltan Bazar bad ha ki jaka jong ka kad liengsuiñ.
Ia kane ka jingpynthikna la ai ha ka Joint Meeting kaba la long ha ka Sngi Baar hapdeng ki nongialam ka All Khasi Meghalaya Tourist Taxi Association (AKMTTA) bad kiba na ka Jylla Assam bad ki heh ophisar na kine ki ar tylli ki Jylla, la ong u Nongaiktien ka AKMTTA u Balajied Jyrwa.
Ula ong ba ha ka jingialang kila iatai sani ia ki jingeh kiba mad da ki nongniah kali Tourist ka Meghalaya ha kaban kyntiew ia ki nongshong kali na Kamakhya Railway Station bad Guwahati Airport namar ka jingkhang lynti bad ka jingshah pyndik.
“Ki ophisar ka Assam kila pynthikna ba kin ym pyndik ia ngi bad ba kin pynbiang ia ki jaka ieng kali khnang ba ngin lah ban kyntiew laitluid ia ki nongshong kali” ong u Bah Jyrwa.
Ha kaba iadei bad ka jingdon ki Middlemen ne Dalal kiba oh dor kaba heh ialade shimet, u Bah Jyrwa ula ong, “Ki ophisar ka Assam kila pan por 15 sngi ban leh da kaba tyngeh ia kine ki ki Dalal. Hadien katei, ngin sa ioh ban kyntiew beit beit noh ia ki nongshong kali”.
Halor ka RTA, ula ong, baroh ar ki Sorkar kila pynpaw ia ka jingkloi ban pyntreikam noh ia ka.
“Ia ka RTA la ai jingbatai da ki nongialam na Assam. Baroh ar ki Sorkar Jylla kila long kiba kloi. Ngi lah ai jingmut ban pynkhie im biang ia ka Joint Action Committee hapdeng ka Assam bad Meghalaya ban iakren bad shim rai katno tylli ki kali kin shah ha ka shi sngi, namar ba kan kynthup lang ia ki trok bad ia baroh ki kali kamai jong kine ki ar tylli ki jylla. Ngi ngin pynkhie im biang ia ka JAC bad ban phah ia ki jingtyrwa sha ka sorkar” ula ong.
Ula ong, ba ka Assam kan pynbiang ruh ia u Helpline Number na ka bynta ki nongniah kali ka Meghalaya ba kin ioh ban pyntip haba ki mad ia kino kino ki jingeh.
Ha kaba iadei bad ka jingkhang ia ki kali kiba nabar ka jylla ban leit kamai ha ki jaka jngohkai kiba don ha Meghalaya, u Bah Jyrwa ula ong, ba kam shim la don kano kano ka jingpynthikna kaba pura kaba la mih ha kaba iadei bad kane.
“Ngi ngim pat sngewhun halor kane, namar ba kam shim la don kano kano ka jingai jingkular kaba 100 na ka 100 ban pynsangeh ia ki kali kiba nabar ban leit sha ki jaka jngohkai ban pynthikna ba ki kali kamai ka jylla kin ioh ia ka lad ban kamai jakpoh” ula ong.
Ula pyntip, ba yn sa pynlong biang ia ka jingialang ha ka 28 tarik u Nailur bad ka tnad Tourism bad Transport, Hotel, Guides, Homestay bad ki Travel Agency ban iakren bad ki balei kila kyntait ban pyndonkam ia ki Local Taxi.
“Kila kyrpad ia ngi ban iarap ha kaban ithuh ia ki jaka ban sangeh ki kali kiba nabar ha Sohra, Jaintia Hill, ISBT bad kiwei kiwei ki jaka. Ngi ngin iatreilang ban pynkloi ia kane ka kam ban pyrkhing ia ki kali kiba nabar ban rung sha ki jaka jngohkai” ula bynrap.
