Shillong, Nailur 08 : U Symbud Myntri Rangbah bad National Vice President ka NPP Bah Sniawbhalang Dhar ha ka sngi Nyngkong ula kyntait ia ki jingkynnoh ba ki MLA ka NPP ki thmu ban leit iasoh sha ka BJP, haba pynpaw ba ka party ka iatylli kawei hapoh ka jingialam u Myntri Rangbah Conrad K Sangma.
U Bah Sniawbha ula niew ia kane ka jingkynnoh kum kaba “shu thok” bad “shu antad hi na kiwei ki seng sain pyrthei”.
“Ngi ha ka longiing ka NPP ngi iakmen lut. Kam don satia kum kane ka jingthmu, ym don jingiakren satia bad ka BJP. Kam don jingma eiei ruh em ia ka NPP” ula ong haba bynrap b aula kren ia kane kum u Symbud Myntri Rangbah bad kum u nongialam ka party uba tip bha shaphang ki MLA.
“Hapoh ka NPP, ym don wat tang uwei u MLA uba don ia kane ka jingthmu. Nga shym la kren tang kum u Symbud Myntri Rangbah, Nga kren ruh kum u nongialam ka party. Nga tip ia ka jinglong bad ka jingdonkam jong ki MLA. Ngi iakmen lut. Ka dei tang ka jingantad na kiwei ki seng sain pyrthei” ula ban jur.
Halor ka elekshon MLA 2028, u Bah Sniawbha ula batai antad ba ka NPP kan jam ia ka jingdon 33 ngut ki MLA namar ka jingtreikam bha jong ka, hynrei ula ong ba ka party kan iai bteng ban burom ia ki paralok ba iatreilang.
“Ngin burom ia baroh ki paralok ba iatreilang bad wat lada ngi ioh 33 ngut, ngin burom ia baroh ki paralok. Kane ka dei ka nongrim jong ka NPP. Wat khuslai, ka por kan sa poi” ula ong.
Haba jubab ia ki khubor antad ba khyndai ngut ki MLA ka UDP kin sa iasoh sha ka BJP, u bah Sniawbha ula ong ba kane ka dei ka rai jong ki bad kam dei ka kam kaba sdang da ka BJP.
“Kam dei ka BJP kaba tan ia ki, lada ki kwah ban leit sha ka BJP. Lada kren hok, ka paw ba kim sngewtynnad satia hala ka jong ka party” ula ong.
U ong ba kane ka Sorkar ba mynta kan pyndep ia ka samoi treikam ba pura bad pynpaw ia ka jing sngew skhem ban wanphai biang hadien u 2028.
“Ngin pyndep ia kane ka samoi treikam bad ngin dang bteng hadien u 2028 ruh, khlem artatien ia kata” ula ong.
