Ka jingkulmar ki mih na ka jingbym khein snep ka Assam ia ka Meghalaya : MDC
Nongstoiñ, Nailur 07: U MLA bad MDC ka Rambrai, u RG Momin bad Lurshai Kharbani, kila dawa ia ka Sorkar Jylla ban buh noh da ka ktem Pulit ha Noapara ban ai jingiada ia ki paidbah ka thain Langpih na ki kam thombor jong ki briew bad ki bor Sorkar ka Assam.
Kane ka jingdawa kala mih hadien ka jingkulmar kaba jia na ka jingwan lum khana samari ka Sorkar Assam myn ha ka 5 tari Nailur, 2026 ha ka shnong Noapara, kaba dei kawei na ki shnong ka thain Langpih.
Kine ki arngut ki nongmihkhmat paidbah kila hiar sha Nongstoin ha ka sngi Nyngkong bad kila iakynduh ia ki bor pyniaid district ka West Khasi Hills ban ujor pyrshah ia katei ka jingwan lum khana samari ka Assam.
Haba iakren bad ki lad pathai khubor, u Bah Lurshai ula ong “Ka Sorkar bad ka Tnad Pulit ruh kim shym la tip satia ia ka jingwan lum khana samari ki briew ka Assam. Ym shym la pyntip satia sha ki bor district bad ki nongialam shnong kila pyntip ba kine ki briew na Assam kila pynbor ia ki paidbah ha kane ka jinglum samari”.
“Ka long kaei kaei kaba sngewsih ba ha kato ka sngi ba ki wan ban leh jubor ia ka census, ki khlem pyntip ei ei sha ki bor pyniaid District ka West Khasi Hills, dei na kata ka daw ka sa mih ka jingklumar. Kumba ka paw shai hi ka Assam kam khein snep ia ki rai ba la dep ban ia teh soskular bad ka Meghalaya” ula kynnoh.
Une u MDC u iathuh ba ka Sorkar Meghalaya kala dep ban lum ia ka khana samari ha ka shnong Noapara hynrei kyndit pat ban iohi ba ka Assam kala wan leh jubor biang bad lum ia ka khana samari khlem ka jingtip ki bor district bad ki nongialam shnong.
Ha kajuh ka por une u MDC ula pynrem ia u Executive Member ka Rabha Hasong Autonomous Council u Arjun Chhetri uba kynthoh ba ki Khasi bad ki Garo ki ju sngewtynnad bha ban leit buhai shnong ha Assam.
“Mynno ki Khasi bad Garo ki leit buhai shnong sha Assam…ka Noapara ka hap hapoh u pud u sam ka Meghalaya” ula buh jingkylli.
“Kum u nongmihkhmat paidbah um dei atia ban kren klumar khlem da ioh ia ki jingtip kiba bniah. Lada u iai kren kumne na ka liang jong ngi ruh ngim banse ban shim da kawei pat ka sienjam” ula maham.
Halor ka jingkynnoh ba dei u Rangbah Shnong ka Noapara uba thang ia ka kali Pulit dang shen, une u MDC ula ong “Ngam lah ban pdiang satia ia kane. Nga la dep bthah ia u Sordar ka Noapara ban ujor da ka mukotduma pynjah burom pyrshah ia une u nongmihkhmat paidbah”.
Ha kajuh ka por, une u MDC ula kyntu ia ki shnong Khasi bad Garo ba kin iatylli ha kaban ialeh pyrshah ia kine ki briew na Assam kiba ju wan pyndik man ka por ia ka suk ka sain ha ka thain.
Une u MDC u pyntip ba ha ryngkat bad u MLA kin sa leit iakynduh markhmat ia u Myntri kam Pohiing (Police) ka Jylla ha ka 9 tarik Nailur, ban iakren halor ka jingbuh ia ka ktem pulit ba shirta ha Noapara.
