Shillong, Nailur 07 : U Myntri Rangbah Conrad K Sangma ha ka sngi Nyngkong ula ong ba kane ka jingwan ha ka sien ba nyngkong eh jong u Vice President ka Ri India sha Meghalaya kan dei kaban sah khana ha ka histori ka Jylla.
Haba kren ha ka jingialang buh mawnongrim ia ki 5 tylli ki project ha Shillong, u Conrad ila ong ba kane ka jingwan ka pynlong ia ki paidbah ka Jylla ban sngew ba ki ioh bynta lang bad long kongsan.
Honoured to welcome Hon’ble Vice President of India, Shri C. P. Radhakrishnan ji, to Meghalaya and have him lay the foundation stones for projects worth over ₹1,010 crore, including:
• New Shillong Water Supply Scheme, Phase II (Part A) – ₹850.58 Crore
• 110-metre bridge… pic.twitter.com/L97WalZJJG— Conrad K Sangma (@SangmaConrad) September 7, 2026
“Nga ai ia ka jingpdiang sngewbha ia u Vice President ha kane ka jingwan ha ka sien ba nyngkong eh sha Meghalaya. Ka jingwan jong phi mynta ka sngi kan dei ka ban sah khana ha ngi. Ka pynlong ia ngi ban sngew ba shah kynthup lang, ka pynlong ia ngi ban sngew ba ngi long kiba donkam, ka pynlong ia ngi ban sngew ba ki nongialam jong ngi ki khmih lem ia ngi. Kane ka dei ka jingsdang jong kiba bun ki jingwan iuhkjat bad ka jingiadei kaba khlain hapdeng ka Jylla jong ngi, ki briew jong ngi bad ma phi” ong u Conrad.
Ula ong ba kane ka jingiadei ka sdang naduh ka jingialong paralok hapdeng u Vice President bad u (L) PA Sangma ha ka por ba baroh arngut ki dang long ki dkhot jong ka samoi ba 12 bad 13 ka Lok Sabha.
Haba pynpaw ba ka Meghalaya kala kynjoh 54 snem mynta, u Conrad ula ong ba ka Jylla kala sakhi ia bun ki jingkiew ba jinghiar hynrei ka bor ba khlain duh jong ka, ka dei ka imlang sahlang, ki lehniam leh rukom nala tynrai bad ka jinglong tynrai kaba la donwat hashuwa ka synshar khadar ba mynta.
“Ha kine ki phra snem, da ka jingkyrkhu ka Sorkar Pdeng, khamtam u Myntri Rangbah Duh Narendra Modi, ym tang ka Meghalaya hynrei baroh kawei ka thain Shatei Lam Mihngi kila kylla dur” ula ong.
U Conrad ula ong ba ka don ka por ba ka Meghalaya kala paw shatrai duh ha ki jingai kyrdan hapoh ka Ri hynrei, ka jingpyrshang ba khlem sangeh, ka jingiohi jngai, ka jingiatreilang kum ka kynhun, ka jingtrei shitom ki samla, ka jingtrei jong ki SHG ki kynthei bad ki nongrep kila pynkylla lut ia kane.
“Mynta ka Meghalaya ka dei kawei na ki Jylla ba kiew sted bha ha ka ioh ka kot hapoh ka Ri kaba kot jan kumba 12.8%, kaba long kaei kaei ka bym lah ban poi pyrkhat ha ki 10 snem bala leit noh” ula ong.
Hynrei ula ong ba ia ka jingkiew shaphrang yn ym lah satia ban thew tang da ka GSDP.
“Ha ngi, ka jingkiew ka ioh ka kot ka dei ban thaw ia ki lad ki lynti na ka bynta ki samla, kyntiew ia ka ioh ka kot ki nongrep ban nang pynbha ia ki lad ki lynti ha ka koit ka khiah. Kam long kaba lah ban pdiang ba wat haba ngi kiew, ki kmie kin duh noh ia la ki jingim haba kha khun” ula ong.
U ong ba ka Meghalaya ka don ia ka MMR ba palat 250, kaba long arshah ia ka national average, hynrei mynta la lah ban pynhiar sha ka 55%-ka jinghiar kaba heh duh hapoh ka ri.
Halor ka pule dangle, ula ong ba ka Jylla kala kiew na ka 410 point ha ka Akanshi-III, kaba rit duh ha ka PGI Index, sha ka palat 520 ha ka Akanshi-I tang hapoh arsnem, kaba dei ka jinglehbha kaba heh duh da kino kino ki Jylla.
U Conrad ula bynrap ba watla ka Jylla kala beh shakhmat ia ka jingkiew irat, hynrei kan ym klet pat iala ka jing ka tynrai, ka kolshor bad ka jingithuh ba kyrpang.
“Ngi don shibun ki jingeh, hynrei lada ka imlang sahlang ka iatreilang, ngin kynjoh ia ka thong jong ngi ban pynlong ia ka Meghalaya kawei na ki Jylla ba don ha ka kyrdan top ten” ula ong.
