Shillong, Nailur 04: Ka Federation of Khasi Jaintia and Garo People (FKJGP) kala thoh sha u Chief Executive Officer ka Meghalaya Health Insurance Scheme (MHIS) ban pynsngew halor jingeh kiba ki nongpang ki kynduh ban ioh jingiarap naka skhim MHIS.
Haka shithi sha u CEO, u President ka FKJGP u Bah Dundee Cliff Khongsit ula ong ba ka MHIS ka la long ka jingkyrkhu bad ka jingiarap kaba khraw ïaki longïing, khamtam ïa kito kiba wan na ki longïing kiba duna ka ioh ka kot.
“Hynrei, ngi kwah ban pynsngew sha iaki jingeh kaba ki nongpang bad ki longïing kiba ia kynduh ia ki jingeh ha kaba iadei bad ka jing pynrung kyrteng haka MHIS Smart Card hadien ba la kut ki por treikam jong ki jaka pynrung kyrteng lane Facilitation Centre ha ki hospital” la ong u Bah Dundee.
U Bah Dundee ula pyntip ba ka seng kala ioh jingtip ba don ki Hospital ki pynlong ïa ka jing pynrung kyrteng (Register) ïa ki MHIS Smart Card tang ha ki por treikam ba la buh kata naduh ka por 9:30 mynstep haduh 6:00 janmiet.
“Hynrei, ka jingpang bad ki jingjia ba kyrkieh ha ka liang ka koit ka khiah kim jia tang ha ki por treikam. Lada don u nongpang uba wan sha Hospital bad uba donkam ban shah sumar ne ban ioh ïa ka jingsumar kaba kyrkieh shabar jong kine ki por treikam, u nongpang u lah ban donkam mar mar ïa ki dawai, ki test bapher bapher bad kiwei pat ki jingsumar kiba donkam. Ha kum kine ki jingjia, u nongpang ne ka longïing jong u/ka ki hap ban siew na ka pla jong ki hi ïa kine ki jinglut” ula ong.
Ula ong ba kane ka jingplie iaki jaka pynrung kyrteng (Felicitation) tang haki kynta ba long trei ka wanrah ïa ka jingeh kaba khraw, khamtam eh ïa ki nongpang bad ki longïing kiba wan na ki longïing kiba duna ka ioh ka kot.
“Namar kata, ngi kyrpad da ka jingsngewrit ban sngewbha ban shimkhia ïa kane ka mat, ban bishar bniah ïa ka jingeh, bad, lada lah, ban wad ïa ki lad ki lynti kiba biang ban pynbeit bad ban weng ïa kine ki jingeh kata ban ioh ïa ki jingmyntoi naka skhim MHIS” ula ong.
