Shillong, Risaw 11: U MLA ka Mawlai Constituency Bah Process T Sawkmie hynne ka sngi ba-ar, u la pynioh da ka madan ieng laiñ ba la siang dewbilat ne ka Assembly ground sha ka skul Sacred Heart Boys Higher Secondary School, Mawlai Phudmuri, kaba la bei na ka skhim Chief Minister Special Development Fund (CMSDF) 2021-22 ba kot T. 10 lak.
U MLA u la aiti ia ka work order sha u principal ka skul, u phadar Alistair S Marwein ha ka jingdon ryngkat kiwei ki phadar, ki nonghikai bad ki khynnah skul.
Haba ai jingkren ha kane ka sngi u Bah Process u pynpaw ba kane ka dei ka sngi sahkynmaw na ka bynta ka Sacred Heart Boys HSS kaba la ioh ia kane ka assembly ground ba la mang na ka skhim u Myntri Rangbah ka jylla.
U pynpaw ba man ki project kiba u la kular sha ki paidbah, u ju duwai bad buh hakhmat U Blei namar U Blei u long nyngkong eh ha ka jingim jong u bad ba ki bor baroh kim shong ha u, hynrei ha U Blei. U pynpaw ia ka sngewnguh bad u ainam ba baroh ki jingai jingiarap kiba u la lah ban pynioh ia ki shnong ki thaw, ki skul bad ki paidbah, ka dei kaba U Blei u la pynioh.
U pynpaw ruh ba kum u nongmihkhmat u don ka jingkitkhlieh ym tang ia ka Mawlai, hynrei ia ka jylla hi baroh kawei.
Une u Nongmihkhmat ula pynkynmaw ruh ba u dang shu dep pynioh ia ka bos kaba 22 lak tyngka na ka bynta ka Sacred Heart Boys HSS ha ki snem ba la leit.
Ha kane ka sngi la ioh ruh ia ka jingkren na u babu Michael Swer, uba la pyrto ia ki kam u bah PT Sawkmie.
Na ka liang u phadar Alistair ruh u la ai khublei ia u MLA halor kane ka jingiarap kaba kum ka skul ka donkam bha bad kaban pynmyntoi shikatdei eh ia ki khynnah skul.
