Sah satang 9121 ngut bym iahap ka Aadhaar bad ka bank account
Shillong, Nailur 02 : Ka Sorkar Jylla ha ka sngi Balang kala pyntip ba ia ka pisa jong ka scholarship hapoh ka Umbrella Post-Matric Scheme na ka bynta ki khynnah pule ST u snem 2025-26, kala poi sha ki khynnah kham kloi ban ia kaba pynbna bad haduh T.19.01 klur ka pisa la pynthep ha ki account jong ki 87691 ngut ki nongioh bynta tang hapoh ki lai-saw sngi jong ki sngi treikam.
Haba pynlait ia ka song pisa ha Shillong College ha ka 27 tarik Nailar, u Myntri Rangbah ula ong ba kan shim por 5-6 sngi ia ka pisa ban paw ha ki bank account, pynpaw ka Sorkar ha ka kyrwoh haba bynrap ba ia ka jingsam ia ka pisa lah pyndep hashuwa ka por ba buh lyngba ka SNA-SPARSH kaba phah ia ka pisa beit beit na ka RBI sha ki account ki khynnah pule.
Ka pyntip ba la dep pynlait ia ka jingsiew ba pura sha baroh ki nong aplai bala pynshisha, kiba u aadhaar jong ki u dei uba dei hok bala pyniasoh sha ki bank account bad ym shym la don shuh ki samla pule kiba shah ieh.
Na ki 96,812 ngut ki aplikeshon bala pynshisha mynta u snem – 61,194 tylli ki dei kiba thymmai bad 35,618 kiba pynthymmai – 87,691 lah dep ban siew.
Kiba sah 9,121 ngut ym pat shym la siew namar ka jingbym pat pyniasoh aadhaar lane ai bakla ia ki account bad ka pisa hi ka dei kaba la buh na ka bynta jong ki, kala ong.
“Ki khynnah pule ki bym pat ioh ia ka pisa la bthah ba kin leit shala ki jong ki ban bad pyniasoh ia u aadhaar bad ki bank account jong ki. Hadien ba dei kane, ia ka jingsiew yn sa pyniaid noh ha kawei pat ka kynti” ong ka Sorkar.
Ka jingdonkam pisa baroh lang na ka bynta u snem 2025-26 ka long T.198.43 klur. Na kane, T.84.55 klur ka dei ka bhah ka Sorkar Pdeng bad T.9.40 klur ka dei ka bhah ka Sorkar Jylla- kaba long T. 93.95 klur baroh lang-kaba la ioh mynta, ia kaba T.91.01 klur lah dep sam bad T.2.94 klur ka dang don ha ka jingpyniaid ia ka kam.
Kaba sah T.104.48 klur yn sa pynlait ha ka installment ban wan ha ki 5 sien sha baroh ki samla kiba dei hok ban ioh.
Ka pyntip baka aplikeshon na ka bynta u snem 2026-27 ha ka National Scholarship Portal kala plie naduh ka 3 tarik Naitung haduh ka 30 tarik Naiwieng 2026 bad la bthah ia ki samla pule ba kin pynthikna ia ka jingpyniasoh aadhaar sha ki bank account ha ka por ba aplai.
Na ka bynta ki jingiarap, ki khynnah pule ki lah ban phone ha u 7005037347 lane 9615000269 lane email [email protected].
