Shillong, Nailur 01 : Ka jingsangeh treikam ba khlem pud jong ki nongsaid ain ha Meghalaya kan dang bteng, da ka jingong ki Bar Association ba ka jingialang bad ka Chief Justice lem bad u Myntri kam Ain Bah Lahkmen Rymbui ha ka sngi Ba-ar, kam shym la lah ban pynurlong ia ki jingdawa ban weng noh ia u Amit Kumar kum u Advocate General.
U Secretary ka Shillong Bar Association Bah TL Jyrwa ula ong ba ka jingiakhih ka dei kaba ialam lang da ka Shillong Bar Association bad ka Meghalaya High Court Bar Association na ka bynta ki bar association baroh kiba don ha ka Jylla.
U iathuh ba ia ka rai ban boycott la shim ha ka sngi Nyngkong hadien ka jingiakhih ba nyngkong ha ka 27 tarik Nailar bad hadien ka jingiakynduh ia u Lat ha ka sngi Saitjain, ka bym shym la don kano kano ka jubab na u Myntri Rangbad bad ka Tnad Ain.
Ka Association ha ka sngi Ba-ar kala iakynduh ia ka Chief Justice jong ka Meghalaya High Court.
Kat kum ka jingong u Bah Jyrwa, ka Chief Justice kala maham ba ka jingpep ban wan pyndep iaki kam ka Iingkashari ka dei kaba la mana hapoh ka hukum ka Supreme Court, hynrei kala kular ruh ia ka jingiatreilang.
“Ka Chief Justice ka ong ba ka rai ba ngi shim ban pep na ki kam ka Iingkashari ka dei kaei kaei ka bym dei ban leh namar ka don ka hukum ka Supreme Court kaba khang ia ngi….hynrei ngi ong ba ngim don lynti pat da kumwei namar wat hadien ki jingialang ba kum kine, ym don mano mano ruh ba shah skhor ia ki jingdawa jong ngi” ong u Bah Jyrwa.
“Kala ong ba na ka liang ka jong ka ruh kan sa pyrshah ban iakren lane pynbeit ia ka jingiakren hapdeng ka Sorkar bad ma ngi..ka ong leit bad pyrkhat biang ia kane ka rai bad sa wan biang ha ka por 2 baje ban trei noh ia ki kam” kala bynrap.
Hadien kane, ka kynhun kala iakynduh ia u Myntri ka tnad Ain Bah Lahkmen Rymbui ha ka por janmiet. U Bah Jyrwa ula ong ba kane ka jingialang kam long satia kaba hun.
“Ngi sngewthuh ba ka jingiakren bad u Myntri kam Ain kam long kaba sngewhun namar kam shym la poi shano shano ruh” ula ong haba kam ba u Myntri um don jingtip ba bniah ia ka dorkhas bala aiti sha u Myntri Rangbah bad tip tang halor ka rai ban boycott.
“U ong ba ia kito ki jingthungkam ba wan na ka Tnad Ain, u lah ban khmih ia ki dalade hynrei ia ka jingdawa ban weng ia u Amit Kumar ka dei kaba hap rai da ka Kynhun Myntri” ong u Bah Jyrwa.
Ula kdew ba ka jingpan u Myntri ia ka rai ka pyni ba ia ka dorkhas bala phah sha u Myntri Rangbah, ym pat shym la wanrah hapoh ka kynhun Myntri.
U iathuh ba u Myntri u khlem ai satia ia kano kano ka por ban shong bishar ia kane ka jingthungkam lane ai ka jingkular ban weng ia u AG.
“Hadien ba ngi mih na ka jingialang, ngi sngew ba ngi hap ban pyniaid shakhmat ia kaei kaba la rai hynnin ka sngi ban nym leit mih sha ki Iingkashari” ula ong haba bynrap ba ka boycott kan dang iai bteng bad ka Steering Committee kan sa shong bishar ia ka jinglong jingman ha ka 3 tarik Nailur.
Haba ban biang ia ki jingkynnoh, u Bah Jyrwa ula ong “Ka jingdawa jong ngi ka long namar u Amit Kumar ula pyn donkam bakla ia ka Ophis jong u da kaba thung iala ki jong ki breiw ha ki mukotduma kiba don ha Meghalaya” bad kynnoh ia ka jingpynsyrwa kai ia ka pisa u paidbah da kaba aikam ia ki briew ba nabar.
Ula ong ba ka jingiakhih kala sdang hadien ba u AG ula niewpoh ia ki bar Association da kaba kynthoh ba kim long satia kiba shngain ia ki kynthei, bad hadien la lap shuh shuh ia kiba bun ki jingleh bym hok.
Halor ka jingsngap jar u Myntri Rangbah, u Bah Jyrwa ula ong “La i kumba u Myntri Rangbah u kwah ban khmih hi marwei ia kane ka kam…ka jingsngap jar u Myntri Rangbah ia ka jingdawa jong ngi…kaei kaba ngi sngew ka dei kaei kaei ka bym long satia kaba khuid”.
Ka Association ka pyntip ba ka dang ap ia ka jingiakren bad u Myntri Rangbah ka Jylla.
