SHILLONG, AUG 30: Ka High Court Bar Association bad Shillong Bar Association ha ka Sngi Saitjain kala leit iakynduh ia u Lat ka Jylla u CH Vijayashankar ha Lok Bhavan bad aiti ia ka dorkhas ban dawa wengkam noh ia u Advocate General u Amit Kumar.
Haba iakren bad ki nongthoh khubor hadien jong katei ka jingialang, u Senior Advocate V K Jindal ula ong ba kane ka kynhun la ialam da ka Executive Committee jong kitei ki artylli ki Association ryngkat bad ki nongiasaid aiñ kiba la rangbah ha ka kam.
Ula ong, ba ka jingshim ia ka rai ban iakynduh ia u Lat kadei hadien ba la iohi ia ki jingpynpaw jong u Myntri Rangbah ka Jylla ha ki rynsan social media.
“Hadien ka jingiohi ia ka jingpynpaw u Myntri Rangbah ha ki Social Media ba ka jylla Meghalaya ka long kaba donbok ban don ia u Amit Kumar kum u Advocate General, khlem da ai ia ka lad ban sngap lem na ki dkhot jong ka High Court bad Shillong Bar Association, kumta kila shim ia ka Resolution ban leit iakynduh ia u Lat ka Jylla” ong u Jindal.
“Haba shimkhia ia katei ka Resolution, ki dkhot jong ki Executive Committee bad ki nongiasaid ain kiba la rangbah kila iakynduh ia u Lat ka Jylla ha ka por 10:30 mynstep ha Lok Bhavan ban aiti ia ka dorkhas” ula ong.
Katkum ka jingong jong u Jindal, u Lat ka Jylla ula shah skhor bha ia ka jingpynsngew jong kine ki kynhun.
“U Lat ula dap da ka jingnsgewtynnad ban pdiang ia kane ka kynhun bad ula ai ia ka hok kaba pura ban sngap bad shah shkor ia ka jingpynpaw jong ki General Secretary ka High Court Bar Association bad Shillong Bar Association bad ki Nongiasaid aiñ kiba la rangbah” ula ong.
U Jindal ula ong, ba u Lat ula kdew ia ka jingshah pyrkhing ia ka riti treikam hynrei ula pynthikna ba ia katei ka dorkhas un sa phah sha ka sorkar jylla.
“Hadien ka jingshah shkor, ula pynpaw ia ka jingshah pyrkhing ia ka riti treikam hynrei ula pynthikna ba ia katei ka dorkhas un sa khmih bniah bad ban phah sha u Myntri Rangbah ka jylla bad ka jingkyrpad ban rah ia kane ka mat sha ka jingialang jong ka kynhun myntri bad ban leh ia kaba donkam ban weng noh ia u Amit Kumar kum u Advocate General bad ruh ban shna ia ka SOP halor ka rukom thung ia u Advocate General, kaba long ka kyrdan katkum ka riti synshar ka ri” ong u Jindal.
U Secretary General jongka High Court Bar Association u KC Gautam ula pynshai ba ka jingdawa ban wengkam kam dei satia kaba dang don hapdeng jong ka jingshah tian bishar kumba la pynpaw da u Myntri Rangbah ka Jylla.
“Kane ka mat kadei halor ka jingdawa ka jong ngi ban weng kam noh ia u Advocate General bad kane ka mat kam shim la don satia hapdeng ka jingshah tian bishar ha ka iingakshari ha kano kano ka rukom ruh. Kane ka kam kan shong eh ha ka jingbishar jong u Myntri Rangbah bad ka kynhun myntri ka jongu. La phah ia ka Resolution sha u hynrei um shim la leh eiei halor kane” ong u Gautam.
“Ngi lah dap da ka jingkyndit ban iohsngew ba u Myntri Rangbah ula ong ba kane ka kam kadei kaba dang don hapdneg ka jingshah tian bishar. Ka jingshisha ka long kaba shai kdar, kala mih ha ki social media bad ha ki lad pathai khubor ba palat ia 1000 ngut ki nongiasaid aiñ kiba la don ha katei ka sngi ha ka rally kila dawa ban weng noh ia u Amit Kumar. Halor kino kino ki daw, ngi lah dep ban pynpaw sha ki lad pathai khubor kham hashwa, kam shim la don hapdeng ka jingshah tian bishar” ula ong.
“Kaei kaba dei ka bynta kabaa don hapdeng ka jingshah tian bishar ka lah iapher bak la bak, kam long kaba dei ia u Myntri Rangbah ban ong ba kane ka kam ka don hapdeng ka jingshah tian bishar. Lehse u Myntri Rangbah um kwah ban pyni ia ka nongrim kaba u ieng ne um shim la ioh ia ka jingbatai kaba bniah bha” la bynrap u Gautam.
Ula ong, ba ka Bar Associations ka ioh ia ka jingkyrshan na baroh ki District Bar Association ha ka jylla.
“Kane ka mat ka long kaba sngewkhia bha. Ngi lah iaid da ka Rally bad ngi don ia ka jingkyrshan na man la ki Bar Association na baroh ki district” ong u Gautam.
