Nongstoiñ, Nailar 28: Ka International Fund for Agricultural Development lyngba ka Meghalamp (Meghalaya Livelihoods and Access to Market), kaba la pyntreikam da ka Meghalaya Basin Management Agency (MBMA), ka la bei tyngka haduh 45 lak na ka bynta ban tei ia ka ïew thymmai ha West Khasi Hills, kaba la tip ruh kum ka Marngor Farmers Markets.
Nalor ka 45 lak tyngka, na ka liang ka shnong Marngor ruh ka la pynlut lang 4 lak shiteng, kum shibynta ka jingsnohkti bad ki jingpynbit pynbiang ïa kane ka ïew thymmai hapoh jong ka thaiñ.
Ia katei ka jaka ba pynlong ïew, la ai sngewbha da ka kur Sohshang ryngkat ka shnong Marngor kaba don ha khappud bad ka shnong Mawblei Mawjnoiñ, kaba la ju khot kum ka ïew Jatra, kaba dang hap ruh hapoh u pud u sam ka Hima Nobosohphoh Syiemship.
Ka jingthmu ban wanrah ïa katei ka ïew ka long halor ka nongrim ban pynmyntoi ïa ki nongrep ka thaiñ. Namar shibun ki mar rep ki mih na katei ka thaiñ khamtam eh u Biskot u ba long uwei na ki jingthung u ba la paw bha ha ka thaiñ bad ha ka jylla hi baroh kawei
Ym tang katta hynrei ïa une u jingthung la ïoh ban shallan ruh shibun wat sha kiwei pat ki jylla.
Katei ka ïew ka don ruh ia kawei ka pung dohkha kaba itynnad bha ha kaba ki briew kiba la sngewthait ban shang ïew, ki lah ban shu leit shong khwai kha bam na katei ka pung tang ha ka jingsiew kaba rit dor shi ryngwiang.
Ia kane ka iew la plie paidbah hynne ka sngi Thohdieng da ka Hema Nayak IAS, Deputy Commissioner ka West Khasi Hills District, kaba la plie ruh ïa u mawnongrim jong katei ka ïew ryngkat ka jingïadonlang ruh u bah A.S.Suting Deputy Project Director MBMA, bah Gideon Kharmawphlang, Executive Director Technical MBMA, bah A.R.Nongkhlaw District Project Manager West Khasi Hills District.
Ka Kongsan haba ai jingkren shwa ban plie ïa u mawnongrim, ka la ïaroh bad ai ruh ki kyntien khublei kitbok kit rwiang sha baroh kiba la donkti, la ka long naduh ki bor shnong, ki bor pynïaid District bad kito baroh kiba la lah ban pynurlong ïa kane ka ïew thymmai.
, kaba la pyntreikam da ka Meghalaya Basin Management Agency (MBMA), ka la bei tyngka haduh 45 lak na ka bynta ban tei ia ka ïew thymmai ha West Khasi Hills, kaba la tip ruh kum ka Marngor Farmers Markets.){kind=link}