Shillong, Nailar 28 : U Myntri Rangbah ka Jylla Conrad K Sangma ha ka sngi Thohdieng, ula plie paidbah ia ka Ophis building ba thymmai jong ka Tnad Excise ha Lower Lachumiere, Shillong, kaba dei ka jingpynkut ia ka jingtreikam ka Tnad ba palat sanphew snem na ka Iingwai.
Inaugurated the new building of the Excise Department at Lower Lachaumiere, Shillong.
The Excise Department has also undergone significant reforms, with revenue growing from around ₹170–180 Crore eight years ago to over ₹500 Crore today. With further reforms underway, we are… pic.twitter.com/Jsiq5HcyJM
— Conrad K Sangma (@SangmaConrad) August 28, 2026
U Myntri ka Tnad Excise Brening A Sangma, u Chief Secretary Dr Shakil Ahammad bad ki Heh Ophisar lem bad ki nongtei ka Tnad Excise kila iadonlang ha kane ka jingplie Ophis.
Haba kren ha ka jingialang, u Myntri Rangbah ula batai ia kane ka jingplie kum ka sngi ban lehkmen ia ka Tnad bad ruh ka Sorkar Jylla.
“Ka ai jingma bad jingsngewhun ia nga ban plie ia kane ka building, kaba dei ka jingdawa bala slem jong ka Tnad” ong u Conrad.
Ula ong ba ka Tnad Excise kala synniang shikatdei eh ia ka pla tyngka ka Jylla bad bynrap ba kane ka building ba thymmai ka long shibynta jong ka sienjam ka Sorkar ban tei bha ia ki jingtei.
Haba kren halor ki jingpynroi ia ki jingtei bala leh ha kine ki phra snem bala leit, u Conrad ula kdew ia ka jingshna pynbha bad pyntrei ia ki Iingskul, ki Police Station bad Outpost, ki Ophis ki Block, Primary Health Centre (PHC), Community Health Centre (CHC) bad ki Sub-Centre.
Halor ka jingkiew ka jingpynmih pisa bad ki jingpynkylla ia ka rukom treikam ha ka tnad Excise, u Myntri Rangbah ula iathuh ba ka jinglum khajna ka tnad kala kiew bun shah bha na kumba T.180 klur ha ki phra snem mynshuwa sha ka palat T.500 klur mynta.
“Ngi la shim ia ka rai kaba heh ban pyniasnoh lang ia ka Excise bad ka VAT, kaba la khmih lynti ban nang pynkiew shuh shuh ia ka jinglum khajna” ula ong.
U Conrad u ong ba ha u Nailar 2026, ka Kynhun Myntri kala mynjur ban pynwanlang noh ia ka VAT halor ka kyiad sha ka Excise Duty da kaba pynkylla ia ka kyndon 44 bad Schedule V jong ka Meghalaya Value Added Tax Act.
Haba pynpaw ia ka jingkyrmen ia ka jingnang kiew shaphrang ka Tnad, u Conrad u khmih lynti ba ka jingioh lum khajna kan sa tam shen ia ka T.1000 klur.
Ia kane ka Ophis thymmai ka Tnad Excise la tei ha ka jinglut kaba kot T.14.55 klur bad kan don ia ka Laboratory, Enforcement Wing, Integrated Excise Management System bad ka Ophis u Commissioner ha kajuh ka building.
