Imphal, Risaw 11: Ka All Manipur Women’s Social Reformation and Development Samaj (Nupi Samaj) kala pynpaw ka jingpyrshah kaba jur halor ka jingpynlong ain jong ka sorkar jylla ha kaba iadei bad ka jingdie kyiad ha ka jylla.
Na ka liang katei ka kynhun seng ba hakhliehduh jong ki kynthei kala kyntait mardor ia ka Draft Manipur Liquor Regulation Policy.
Na ka liang ka sorkar Manipur dang shen kala iaid shakhamt ban pynkhreh ia kane ka polisi na ka bynta ban ithuh noh ia ka jingdie kyiad wat hadien ki jingiakhih pyrshah da ki kynhun bapher bapher jong ka imlang ka sahlang.
“Ngim lah ban pdiang ha kaba iadei bad kane ka draft policy,” ong ka president ka Nupi Samaj ka Th Ramani Devi.
Kane ka president kala buh jingkylli ruh la ka sorkar jylla kam don da kiwei pat ki tyllong na ka bynta ban kyntiew ia ka ioh ka kot ka jylla lait na ka kyiad.
“Ngim ju khmih lynti ba u myntri rangbah (CM) ka jylla u N Biren Singh uba la kam ia lade kum u CM jong ki paidbah ba un shim ia kaba kum kane ka rai,” ong shuh shuh ka president.
Kane ka draft policy jong ka sorkar Manipur ban pynlong ain ia ka jingdie kyiad ka thmu na ka bynta ban pynduna ha kaba iadei bad ka jingdawa ia ki jait jingdih ba pynbuaid, ban tehlakam ia ka jingjyllei jong u drok, ka jingplie ha ka liang ka ioh kam ioh jam, ka jingpynioh khajna ia ka sorkar jylla bad ban weng ia ka jingeh na ki kam khaii kyiad ba beain ba la khang pyrshah.
