Shillong, Nailar 27 : U Myntri Rangbah Conrad K Sangma ha ka sngi Palei ula ong ba ka Meghalaya kala jam shakhmat ban long ka Jylla ba bun eh ka jingrep organic hapoh ka Ri bad ka Sorkar ka kwah ban pynduna bad khatduh ban pynduh syndon ia ka jingpyndonkam sboh dawai.
“Ngi hap ban kynmaw ba ka khubor kaba heh ka long ba ka Meghalaya bad ka pyrthei baroh kawei ka dang pyrshang ban jam sha ka kam rep ba khlem leh dawai (organic). Ngim don hangne ban pynshlur hynrei ban pynsngewthuh ia ki nongrep ban nym pyndonkam ia ki dawai. Ngi la sdang pyn donkam da ki bio-fertilizer ne ki sboh khniang. Ngi la don ha ka jingpynkylla bad ngi kyrmen ba shisien ka sngi ngin ym don shuh ia kino kino ki kynja sboh dawai” ong u Conrad ha Iingdorbar Thaw Ain.
“Ka lynti kaba dei bala leh da ka pyrthei baroh kawei ka long ban test ia ka khyndew. Ngi la jam mynta ban nang pynbun ia ka jingai syrnot ha ka kam rep ba khlem khleh dawai bad ka Meghalaya ka long kaba la pynkhreh bha mynta” ula bynrap.
U Myntri rangbah ula bynrap ia ka jubab jong u Myntri ka rep ka riang Timothy D Shira halor ka jingkylli u President ka VPP bad MLA ka Nongkrem halor ka jingpynbor ia ki nongrep ban thied ia ki SSP ha ka dor ba T.900 shi byrni.
Haba pynshai ia ka dor, u Conrad ula ong “T.266 ka dei na ka bynta ka urea bad ki dkhot kila kylli ia ka SSP. Ka urea ka long T.266 bad ka dork a SSP ka long T.800 shi byrni ha ka dor subsidy. Ka subsidy ka long 25% bad ka dor iew ka long T.1200”.
Halor ka jingpyrrkhing ia ki kam khaii tuh, u Myntri Timothy D Shira ula ong ba kam don lynti satia ban khaii tuh ia ka SSP namar ka jingpeitthuh kaba pyrrkhing bha.
“Ki don haduh 129 ngut ki Inspector bad ki ju leit talasi man ka por. Baroh ki nongdie ki hap ban wah ia ka dor bad die ha ka dor bala buh da ka Sorkar. Ka long kongsan ba hap pynrung ia man ki mar ba die hapoh ka Integrated Fertilizer Management System (iFMS). Lada die black shi kilo, ia kane lah ban buddien” ong u Shira.
U iathuh ba la aibor ha ki Director ka Tnad Agriculture bad Horticulture ba kin pynlong ia ki jingtalasi.
U Myntri Rangbah ula bynta ba haduh 1,432 sien la pynlong ia ka jingtalasi ba syndet syndet kat haduh mynta.
