Shillong, Nailar 25: Ki Pulit ka Amlarem ki la ioh bat 2 tylli ki thuk thuk ba don number plate, AS-01FK 3482 bad AS-26A 9873 ha Ladjaplem ha ka 24 tarik u Nailar hadien ka jingkhynra bala pynlong kat kum ka jingioh jingtip shaphang ki thuk thuk ba shah tuh.
Ha kane ka jingioh kurup thuk thuk, la ioh kem ia u nongniah Pynshngai Jyrwa (23 snem) uba dei na Umsning-Mawkhan bad u Rijiedstar Shylla (27 snem) uba dei na Umsning-Sohkyndur, Ri-Bhoi.
Hadien ka jigntohkit bniah la pynshisha ba ia kine ki thuk thuk la tuh na Changsari, Assam, ha kaba la register ia ka case katkum ka kyndon 303(2) BNS.
Baroh ar tylli ki thuk thuk bad iaki briew shah kem, la aiti sha ki Pulit ka Changsari PS ha ka 25 tarik Nailar.
Ha katei ka juh ka sngi, ki pulit ka Dawki PS ki la bat sa 2 tylli ki thuk thuk kiba la suba ba ki dei kiba shah tuh. Kine ki thuk thuk ki don u number plate NL-07EB 8467 bad AS-05S 3378 bad ia kine ki thuk thuk mynta ki dang don hapdeng ka jingpynshisha.
U SP jong ka West Jaintia Hills u la kyntu ia ki paidbah buh bha iaki kali bad ban pyntip ia ki kam suba don nongtuh daka ba phone ha u nombar 112.
