Shillong, Nailar 25: U Myntri Rangbah ka Jylla u Conrad K Sangma ha ka sngi Baar ula ong, ba ka sorkar jong u kala pynkut noh ia ka status quo kaba la palat 50 snem ha ka iakajia pud bad ka Assam da kaba lah ban pynbeit noh ia 6 na ki 12 tylli ki jaka kiba don ha ka jingiakajia.
Haba jubab ia ka jingiatai kaba la wanrah da u MLA ka VPP u Bah Ardent Miller Basaiawmoit halor ki 10 tylli ki mat jingdawa ka seng, u Conrad Sangma ula ong, “Lah palat ia ka 50 snem ia ka mat jong u pud u sam lah shu ieh beit kumba ju long ne Status Quo.
Ha u Lber 2022, kane ka sorkar kala iasoi ia ka MoU bad ka Assam bad pynbeit ia ka Tarabari, Gizang bad Hahim ha West Khasi Hills, Boklapara bad Khanapara-Pillangkata ha Ri-Bhoi bad Ratacherra ha East Jaintia Hills.”
Halor ka jingwan rung be-aiñ bad ka jingkhmih ia ka khappud, ula ong ba lah dep ban buh 18 tylli ki Anti-Infiltration Check Post, ka Railway Facilitation Centre bad Land Customs Station bad ia ki District Special Squad ha baroh 12 tylli ki Districts ban khynra ia ki briew kiba wan rung be-aiñ.
Ula ong, ba ki BSF kidei ki nongiada kiba hakhmat duh ha ka thain khappud bad kiwei pat ki ri katba ki pulit ka jylla ha ki police station, outpost bad check post kidei kiba wan baar, da ka jingiaid pahara lang, jingtalasi bad ka jingpyndonkam ia ki kor elektronik ban khmih bniah kynthup ia ka jingbuh ia ki ‘Light’ kiba khlain bor bha.
Ban khmih bniah ia ka jingwan rung be-aiñ, 12 tylli ki District Task Force lah dep ban thaw ban bat ia ki briew kiba na Bangladesh, ban pynlong kynsan ia ki jingkhynra da ki kynhun kiba kynthup ia ki majistor, pulit bad ka tnad Infiltration bad ka State Level Committee kaba la khlieh da u Principal Secretary, Home (Political) ban ithuh ia ki briew kiba nabar ri kiba la sah palat naduh ka 1 tarik u Kyllalyngkot 2011 bad la phah ia ka kaiphod man la ka bnai sha ka MHA.
U Sangma ula ong, ba ki Nokma, Rangbah Shnong bad ki Village Defence Party kidei kiba lah iadonbyntalang, la pynlong ia ki prokram ai jingpynsngewthuh bad ki ophisar ki leit ban jngoh man ka por bad ban sah ruh ha ki shnong kiba don ha khappud.
Ula ong ba la bthah ia ki District kiba don marjan bad ka Assam ba kin long kiba husiar hadien ba kala don ka jingkyndang ia ki briew ha katei ka thain bad kala don ka jingkhmih bniah ha ki surokbah da ka jingiarap ki Rangbah Shnong. Ki nongshong shnong kiba la suba jur kiba na Assam, Tripura bad West Bengal hadien ba la lap ia ki, la phah ba kin leit phai noh na ka jaka kaba ki wan.
Halor ka MRSSA, 2016, ka jingrejistar kala kiew sha ki 966 tylli ki shnong, 561 tylli ki dong, 1,653 ngut ki trai iing bad 5,042 ngut ki nongshong wai na ki 817, 427, 1,110 bad 3,297 ha u Rymphang 2026. La rejistar ruh ia ki nongtrei bylla kiba wan nabar hapoh ka Act jong u snem 2020.
Halor ka jingdawa ka VPP ban bat bad pynphai biang ia ki wanrung tuh, u Sangma ula ong ba ka Anti-Infiltration Directorate kadei ka tnad treikam bad naduh u snem 2021 haduh mynta, lah ioh bat ia 736 ngut ki briew kiba nabar ri bad la pynshitom ia ki katkum ka aiñ bad 262 ngut kila shah pynphai noh hadien ba kila pyndep ia ka jingshah pynsajia bad kila ioh jingbit ban leit phai noh.
Ula bynrap ba ka sorkar ka iengskhem ia ka jingsynshar katkum ki kyndon jongka ka aiñ bad ia ka jinglong jingman jong ki jaka.
