Khot ka Sorkar ia ka KSU ban wan iakren halor ki mat jingdawa : CM

Shillong, Nailar 24 : U Myntri Rangbah ka Jylla Conrad K Sangma ha ka sngi Nyngkong, ula iathuh ba ka Sorkar kala thoh shithi sha ka Khasi Students Union (KSU) ba khot ia ki ban wan sha ka miej iakren halor ki 5 tylli ki mat jingdawa jong ka.

“Ngi la thoh shithi sha ka KSU bad kyntu ia ki ba kin wan sha ka jingiakren. Ngi khmih lynti ban gin sa ioh ia ka jubab lehse mynta ka janmiet ne lashai ka sngi bad ngin sa iakren ia baroh san tylli ki mat jingdawa jong ka” ong u Conrad haba iakren bad ki nongthoh khubor.

Halor ka jingkynnoh ba ka Sorkar ka khlem leh eiei halor ki jingdawa ka KSU, u CM ula ong “Ai ba ngan kular ha phi ba kane kam long kumta bad ha kiba bun ki bynta, ha ka jingshisha, ki kam kila iaid. Kala don ka jingpynsngewthuh bakla bad kat kiba don ki mat kiba mih, ngin sa pynshai ha ka jingialang ba ngin sa iashong bad ki dkhot ka KSU”.

“Kumta, kat kaba donkam ki jingpynshai ngin sa ai ha ki hynrei na ka liang jong ngi, kumba nga ong, ha jan baroh ki bynta, la ka dei kane ka seng lane kiwei ki seng kiba la wan shakhmat, ka Sorkar kala shimkhia bha ban leh eiei ia kiba bun ki jingdawa jong ki bad ngi la kren shai ruh ia kiei kiba lah ban leh bad ki bym lah ban leh. Kat kaba ngi lah ban leh, ngi ai ia ka jingkular bad ngi pyniaid shakhmat ia ka kam. Kala don ka jingbym biang ha ka jingaiktien. Ngin pyntjokna ba ngin don ia ka jingialang bad ngin sa pynshai ia baroh kito ki mat” ula bynrap.

Haba kylli la ka KSU kan pdiang ia ka jingkyrpad ka Sorkar, u Conrad ula ong “Ka shithi lehse kala leit mynta hynrei ngin sa tip kham hadien ha ka por janmiet lane mynmiet”.

Halor ka jingdawa ban pynlait ia ki Nongialam ka KSU bad ban weng ia ka MMPO/MPDA pyrshah ia ki, u Myntri Rangbah ula ong ba ka ain kan iaid la ka jong ka lynti.

“Ka ain ka don halor ka nongrim bad kaei kaba jia, ka ain kan shim la ka jong ka lynti bad kumta kam bha ia nga lane iano iano ruh ban shu wan bad ong ba ki rule bad ki ain kin kylla tang namar ka dei kawei ka Sengbhalang lane kawei pat lane ki riew shimet. Nga sngew ba kane kam iahap ha ka synshar khadar. Kumta, sngewbha shah ia ka ain ba kan shim la ka jong ka lynti bad nga Sngew ba kam bha ia ngi ban tuklar” ula ong.

Halor ka jingiaid ka jingtohkit ia ki kam thombor ha ka 19 tarik Nailar, u Conrad ula ong “Ngam don ia ka jingtip bad nga ia mynta. Ngan sa shong bishar ia ka jinglong jingman mynta ka sngi hynrei kumba nga ong, ngi la ithuh ia san ngut ki riew tap khmat bad ki Pulit kila shim ia ka sienjam ban leh eiei bad kin iai bteng ha kaban pynthikna ba baroh ki runar kiba donkti bad lam sha kane ka jinglong jingman ka suk ka sain, kin sa shah kem bad ioh ia ka jingpynsajia ba dei hok”.

Haba kylli la ka Sorkar kan wanrah noh da ki SOP na ka bynta ka jingpynlong ia ki rally bad iaid paidbah, u Conrad ula ong ba ha ka jingshisha ki kyndon ba dei ban leh bad bym dei ban leh kila don haba ai ia ki jingbit.

“Mynta kaei kaba ngi hap leh ka long ban nang pynbun ia ki kyndon jong kiei kiba lah ban leh bad ki bym lah bad ngin sa bynrap ia ki. Ngin pynthikna ruh ha kaban pynjari ia ki kyndon ba kham tyngeh bad kumba nga ong, ki kyndon kin beit beit ha ka por ba ai ia ki jingbit” ula ong.

Haba kyntait ia ka jingpulom ki bor syntiat ban tehlakam ia ka rally thuk thuk, u Myntri Rangbah ula ong “Kam don satia ka jingpulom. Lada kren hok, ki bor khmih kila khmih lut ia kiei kiei baroh, ngi treikam ruh da ka jingpyrkhat ha ka nongrim ka jingshaniah bad ka jingkular bad ngi jam shakhmat bad kane ka jingshaniah bad jingkular”.

U iathuh ba ki bor district kila buh ia ki pulit ha ki jaka ba iaid ka rally hynrei ban khmih bniah ia ki ka long kaba eh namar ka jingheh ka rally bad ka jingsaphriang jong ki jingjia na kawei ka jaka sha kawei pat.

U Myntri Rangbah ula bynrap ba ka jingleh jong ki runar ka long kaba palat pud bad kala pynkyndit wat ia ki paidbah.