Pynkynriah ka AKMTTA ia ka pakhang rung ki kali Assam haduh ka 10 Nailur 

Kular ka Sorkar ban iapynbeit ia ki jingeh bad ki kynhun na Assam

Shillong, Nailar 23 : Ka All Khasi Meghalaya Tourist Taxi Association (AKMTTA) kala pyntip ba kan sangeh shuwa ia ka jingkhang ia ki kali Assam ban rung sha Meghalaya haduh ka 10 tarik Nailar hadien ka jingkular ka Sorkar ban khot jingialang lang ia ki seng ki kali tourist ka Assam ban iapynbeit ia ki jingdawa ka Seng.

Ka AKMTTA kala rai ia kane hadien ka jingialang ba kyrkieh, kaba la lum da u Symbud Myntri Rangbah Bah Sniawbhalang Dhar ha ka sngi U Blei ha Shillong.

U Symbud Myntri Rangbah ula pyntip ba ka seng ki kali Tourist ka Jylla kila mynjur ban sdang leit kamai biang sha Assam tad haduh ka 10 tarik Nailur bad ban sangeh noh ha kaban khang ia ki kali Assam ban rung sha Jylla.

Ia kane ka jingialang la pynlong hadien ba kine ki seng kila iengskhem ha ka nongrim ba kin nym leit rung shuh sha Assam bad rai ban nym shah ia ki kali tourist na Assam ban wan rung sha Jylla, hadien ka jingkynnoh shah pyndik ha Assam namar ki kam thombor kiba jia ha Shillong ha ka 19 tarik Nailar.

U Bah Sniawbha ula ong “Hadien ka jingiakren kaba sani bha, ngi la shim ba ka long ka jingialang ka ba seisoh. Ki seng kila pynpaw ia katto katne ki jingeh ba kila iatakhuh ha kine ki khyndiat bnai bad snem tang mar syn rung sha Assam. Ngi la sngap ia ki jingeh jong ngi bad ki sngewkhia jong ki, ki dei hok kiba shisha”.

Ula pynbna ba ka Sorkar kan sa lum ia ka jingialang ban iadonlang ki seng kali tourist ka Assam ha shuwa ka 10 tarik Nailur ban pynbeit ia kiei kiei baroh.

“Ngi la rai ba hashuwa ka 10 tarik Nailur, Nga la khot ia ka jingialang ha ka kyrdan jong nga bad ki Commissioner ka Transport ka Assam bad Meghalaya, ha ka jingiadonlang ki dkhot jong baroh ki seng kali tourist na baroh ar Jylla, bad ngin pyrshang ban pynbeit ia baroh ki jingeh bala mad da ki nongniah kali haba ki rung sha Guwahati bad kiwei pat ki bynta jong ka Assam” ula ong.

Haba pynpaw ba baroh ar Jylla kila poi sha ka jingiasngewthuh jingmut ban wanrah pat ia ka jingsuk, ula ong “Kila don ki huri hura ha kine ki khyndiat sngi bala leit khamtam hadien ki jingjia ha ka 19 tarik Nailar. Hynnin ngi la leit sha Assam bad ngi la poi sha ka jingiasngewthuh jingmut ba dei ban wanrah pat ia ka jingsuk. Kila don shibun ki jingjia bad jingpyndik ha Assam hynrei ngim long pyrshah iano iano ruh. Ngi kwah ba ka Sorkar kan shimkhia bha”.

Halor ka jingpakhang surok, u Bah Sniawbha ula ong “Ngi la iamynjur lang bad ngin bteng biang ban iarung iamih kumba ju long naduh mynta ka sngi haduh ka 10 tarik Nailur. Ngin sa iakren bad ka liang na Assam bad kyrmen ba ngin ioh ia ka jubab kaba sngewtynnad na baroh ar Jylla”.

Ula bynrap “Naduh kane ka khyllipmat, ngin sa ialeit iawan laitluid kumba ju long. Hadien ka 10 tarik Nailur, ngin sa shim ia ka rai”.

Haba kylli la ka Assam kala weng ia ki jingpyrrkhing, u bah Sniawbha ula ong “Ka khubor ba ioh na ka liang ka Assam ka long ba kila weng ia ka pakhang surok”.

Haba iadei bad ka jingsiew bai lutksan ia ki kali ba shah pynjulor ha ka 19 tarik Nailar, ula ong “Ka Sorkar kan sa shimkhia ia kane kat kum ka ain. Ngi la pan ia ki jingtip ba bniah halor ka jingdon ki kali kiba shah pynjulor na ka Assam bad na Jylla ruh kumjuh”.

Haba kren hadien ka jingialang, u President ka AKMTTA Bah Ricaldinus Dohling ula ong “Ka Sorkar kala pan por 10 sngi na ngi. La kular ha ngi ba hapoh ka 10 tarik Nailur, kan sa khot ia ki nongialam jong ki seng kali tourist na Assam bad ki Ophisar ka Tnad Transport na Assam khnang ba ngin iashong bad iakren ia ki jingdawa jong ngi”.

U iathuh ba ka AKMTTA kala dawa ba ki kali kamai Tourist na Meghalaya kin nym iaid kamai shuh sha Assam bad ba ki kali Assam ruh ki dei ban pynkut ia ka kamai ha Jorabat.

“Halor kane, hadien ka 10 tarik Nailur, ngin sa iakren bad ka Sorkar. Na ka liang jong ngi, ngim pat lah ban ong kaei ka rai ka ban mih, la ka Sorkar kan pynhun ia ngi ne em hapoh ka 10 tarik Nailur. Ngin sa shim rai hadien katei ka jingialang” ong u bah Dohling.

Haba la ka Seng kala pynsangeh ia ka jingkhang wan rung ki kali Assam sha Meghalaya, ula ong “Ia mynta, ngin pynlait shuwa shipor. Ngin sa batai ia ki para nongniah kali ha Damsite halor ka rai ba mih mynta ka sngi ban aipor 10 sngi ia ka Sorkar bad kyrmen ba kan don ka jingmih kaba sngewtynnad”.

“Tad haduh ka 10 tarik Nailur, ki kali na Assam bad Meghalaya kin iaid kamai biang kumba ju long” ula bynrap.