Shillong, Nailar 23 : Ka bor district ka Ri-Bhoi kala khang pyrshah ia ki pakhang surok, jingkhang iaid ki kali bad kino kino ki jingpynthut ia ka jingiaid ki kali, haba maham ban leh da kaba tyngeh kat kum ka ain pyrshah ia kino kino kiba pyrshang ban khang ia ka jingiaid ki kali ba wan na Assam ne na kino kino ki jaka jong ka Ri.
Ka hukum, bala pynmih da u Deputy Commissioner bad District Magistrate ka Ri-Bhoi Dr Abhishek Saini ha ka 22 tarik Nailar hapoh ka kyndon 163 jong ka Bharatiya Nagarik Suraksha Sanhita (BNSS), kan treikam haduh 60 sngi satang lada weng noh lane don ka jingpynkylla.
Kane ka sienjam kala mih hadien ka jingshah pynthut ka leit ka wan ki kali ha National Highway-6 bad kiwei ki surok kiba pyniasoh ia ka Assam bad Meghalaya. Ka hukum ka pynpaw ba ki nongpyniaid kali kali ka Assam, ki Tourist Taxi Association bad ki nongniah, kila weng ia ki jingiakhih jong ki bad ki pakhang surok, kaba la plie biang ia ka leit ka wan hapdeng ki ar Jylla.
Ka bor district ka ong ba kala ioh ia ka khubor ba ki Taxi Association bad kiwei ki Kynhun ka Jylla, kynthup ka All Khasi Meghalaya Tourist Taxi Association (AKMTTA), ki lah ban pyrshang ban pynjari lang ia ka pakhang surok, pynsangeh ia ki kali lane ban talasi ia ki permit jong ki kali.
Ka hukum ka khang pyrshah ia ka jingbat ia ki kali khlem ka jingbit lane ban khang ia ka jingrung ki kali kamai, ki tourist taxi, ki kali shimet bad ki kali kit mar lane iaid lyngba ka Ri-Bhoi na Assam ne kino kino ki jaka.
La khang pyrshah ia ki jingkhang lynti ia ka surok, ka jingshong kyllain mungor, rally lane buh taiar ne maw lane kino kino ki jingker ha National Highway-6, State Highway, Bypass ne ki link road.
Ka bor district kala khang ruh ia ka jingpynhiar jubor ia ki passenger ne nongjngohkai, byrngem byrsit ia ki nongniah kali, dawa kuna ba khlem jingbit lane pynjri ia ki kyndon beain da ki seng.
La khang ia ka jinglum briew ba san ngut ne palat ha shilynter ka surok NH-6, toll plaza bad ki entry point lada don jingthmu ban khang ia ka surok, bat ia ki kali ne pynthut ia ka leit ka wan ki kali. Ka hukum ka maham ruh pyrshah ia ki jingthoh kynshoit ha ki social media, ki khubor jingkren ne video kiba thmu ban pynmih biang ia ka jingpakhang surok ba thymmai ne ka jingpynphai markylliang.
Kiba pynkhein ia kine ki kyndon kin ngat ha ki kyndon ain jong ka Bharatiya Nyaya Sanhita Act kba iadei bad ka jingialeh pyrshah ia ka hukum ki bor district, ka jingkhang beain, jinglum briew beain bad kiwei.
Ka hukum kan pyntreikam ruh ia ka National Highway Act lada don ka jingpynthut, jingpynjulor lane buh jingma ia ka leit ka wan ki kali ha ki National Highway.
La bthah ia ki Pulit ka Ri-Bhoi ba kin pyntreikam pyrrkhing bha ia kane ka hukum bad ban iaid pahara khlem sangeh ha shilynter ka surok National Highway-6.
