Shillong, Nailar 22 : Ka Tnad Meghalaya Police kala thung ia ka kynhun Special Investigation Team (SIT) ba san ngut ki dkhot, ka ban tohkit ia ki kam thombor, thang kali, pynjulor kali bad shoh briew, kiba jia ha ka rally ka Khasi Students’ Union (KSU) bad hadien, myn ha ka 19 tarik Nailar.
Kat kum ka hukum bala pynmih da ka Director General of Police (DGP) Kong Idashisha Nongrang, ia ka SIT la thung ba kan treikam mardor khnang ban pynthikna ia ka jingtohkit ka bym shah khuid, ka bym shah liang bad kaba sted haba iadei bad ki jingjia kila lam sha kiei kiei baroh, kaba kynthup ia ka jingpynjulor ia ki nongkynti paidbah bad riew shimet bad ka jingshoh ia ki riew paidbah bad ki Pulit.
Ia kane ka kynhun tohkit yn khlieh da u Inspector General of Police (Law & Order) DNR Marak.
Kiwei pat ki dkhot ki long u Deputy Inspector General of Police (Eastern Range) S. Nongtnger, East Khasi Hills Superintendent of Police V Syiem, Superintendent of Police (Cyber) Dheeraj Yadav bad Deputy Superintendent of Police (Crime), East Khasi Hills, Bipul Das.
Ka hukum ka ong ruh ba ka SIT ka lah ban nang pynrung dkhot shuh shuh ia ki Ophisar ne ki Pulit lada ka sngew donkam.
Ia ka SIT la bynshet ba kan wad tynrai ia ki daw bad ki kam kiba lam sha kine ki jingjia bad ban pynlong ia ka jingtohkit kaba bniah bha halor ki case bala register haba iadei bad ka rally bad ki jing jia thombor kila mih na ka khnang ban pynthikna ia ka jingpyntreikam ba ryntih ia ka ain.
Kan trei ruh ia ka kam ban ithuh bad kem ia baroh kiba donkti, kynthup ki riewtapkhmat kiba iashim bynta bad kito kiba pyndonkam ia ki kali arshaka kiba tap ia u nombor kali, da kaba peitthuh na ki video CCTV bad kiwei ki video bad ki dur ki dar ba la lum sakhi.
Ka kynhun kan shong bishar ruh ia ka bynta jong ka nongpynlong ia kane ka rallu bad ka jingpynkheinn ia ki kyndon halor ka jingbit bala ai ban iaid rally, bad la buh ban pyndep ia ka jingtohkit ha ka por bala buh ban wanrah ia ka case sha kaba kut bad pynthikna ia ka jingbishar ba hok kat kum ka ain.
