Shillong, Nailar 21: Ka Sorkar Meghalaya kala pynkupburom ia u nongniah bad nongbud jong ka bos elektrik ba kamai namar ka jingpyni ia ka jingdon jingmut kaba skhem bad ka jingshlur ban iada ia ki nongleit nongwan ha ka por ba jia ka jingshah kawang maw ha ka rally thuk thuk ka KSU ha Wahkdiat.
La pynkup burom ïa u Driver Fullmoonwell Lyngdoh bad u Conductor Banmanbha Marwein jong ka bos elektrik “Ka Bos Jong Ngi” (ML 05 AH 5045) da ka tnat Urban Affairs bad la ai sngewbha ruh mar T.10 hajar.
Katei ka jingjia ka la jia ha ka 19 tarik Nailar ha ka por kumba 5:51 PM ha kaba katei ka bos, kaba kamai na Air Force sha IIM, ka la iakynduh ia ka jingiaid paidbah Rally ha Wahkdiat, Nongmensong.
Ki runnar ki la kawang maw ia ka bus bad pynpra ia ka jingkhang ba shakhmat jong ka, kaba la buh ia ki nongleit nongwan ha ka jingma.
Katkum ka jingong jong ka tnad, ki nongtrei jong ka Bos kim shym la pyni ba ki tieng.
U nongbud u la bthah mardor ia ki nongleit nongwan ban dem shapoh bad ban rieh, katba u nongniah u la pyneh ban niah ia ka Bos sha ka jaka ba shngain kiba shong haka bos.
Ym shym la don uwei ruh ki nongshong bos ba la mynsaw ha kane ka jingjia.
Ka Secretary ka tnad Urban Affairs kong Wanrilin AM Booth ka la ong ba kane ka jingai khublei ka long ban ithuh paidbah ia ka jingshlur bad jingstad jong ki ban pynthikna ba ki paidbah kiba shong haka bos ki lait naka jingma.
Ha kane ka sngi la donlang ka Deputy Secretary ka Saloni Verma, u Secretary ka MUDA u Bah Sainpyniar S Syiemlieh, u Director ka tnat Urban Affairs u P. Kr. U Boro.
