Shillong, Nailar 20 : Namar ki jingshah thombor ki kali Sorkar ha ka jingiakhih jong ka KSU, ka Meghalaya Government Drivers’ Welfare Association (MGDWA) kala kyntu ia ka Sorkar Jylla ban kiar shuwa ha kaban phah ia ki kali sorkar sha ki jaka kiba don jingma.
Ha ka dorkhas bala phah sha u Chief Secretary haka sngi Palei, u President ka Association Bah C Syiemlieh ula pynpaw ba bun ki kali Sorkar kila shah pynjulor bad don ruh kiba la shah thang ha ki kynta ba long ka rally ka KSU ha ka sngi Balang bad katto katne ngut ki nongniah kali kila mynsaw malu mala katba ki dang don ha ka kam.
Haba pynpaw ia ka jingsngewkhia halor ka jingshngain jongki nongniah kali kiba niah ia ki kali Sorkar wat ha ka por ba jur ka jingma, ka Association kala kyrpad ia ka Sorkar ba kan pynmih jingbthah sha baroh ki Tnad bad Directorate ba kin kiar shuwa ba kin leit jingleit da ki kali Sorkar sha ki jaka kiba don jingma.
Ka Association kala ai jingmut ba kat kaba lah ban leh, dei ban shah ia ki nongniah kali Sorkar ba kin pyndonkam da ki kali shimet jong ki Ophisar haba ki leit ha ka kam ia mynta shipor tad haduh ban da la jai jai ka jinglong jingman.
“Ia ki kam ba kyrkieh lehse, lah ban pyniaid ha ryngkat ka jingai pahara kaba biang” ong ka Association ha ka shithi.
Kala kdew ruh ba wat hapdeng ka jinghap treikam ha ki khep kiba jynjar, ki nongniah kali Sorkar kim shym la ioh satia ia ka Risk Allowance bad kyrpad ia ka Sorkar ban pyrkhat lem ia kane ka jingdawa kaba la sahteng la slem bha.
 kala kyntu ia ka Sorkar Jylla ban kiar shuwa ha kaban phah ia ki kali sorkar sha ki jaka kiba don jingma.){kind=link}