Shillong, Nailar 20: Ka jingiakhun hapdeg ka Nangkiew Irat bad ka Nongkseh kala kut ha ka jingiakhaid da mar shi kol ha ka Shillong Premier League 2026, ba long ha ka sngi Balang ha SSA Stadium, Polo.
Ha kane ka jingiakhun, ka Nangkiew Irat ka don artylli ki jingpynkylla ha ka thup ialehkai ka jong ka, ha kaba u Yhoto Lohe bad u Wallamsuk Nongkhlaw ki la ialehkai naduh kaba sdang ha ka jaka ka jong u Sangti Janai Shianglong bad u Shrikant Gadaba.
Katba na ka liang ka kynhun ialehkai ka Nongkseh ha ka jingiakhun ba hynne ka sngi, ka la pynkylla haduh 7 ngut ki player kaba kham bun na ki, kidei ki rang ialehkai kiba kynsai kiba la ailad ba kin shong pynjah thait hadien ka jingiakhun ia ka Durand Cup.
Ha ka jaka jong kine, ki rang ialehkai kiba la ioh ban ia mihkhmat naduh kaba sdang ki long u Kynsailang Khongsit, Aenam G Jyrwa, Dawanchwa C Challam, Banraplang Pyngrope, Kitboklang Pale, Daraphun Talang bad Mebankhraw Wahlang, kiba la shong pat ki long u Banskhemlang Mawlong, Banpynkhrawnam Nongkhlaw, Sheen S Sohktung, Hardy Cliff Nongbri, Arlangky Nongsiej, Kynsaibor Lhuid bad Guidle Syiemlieh.
Haba la shem bad iohi ia kine ki jingkylla marsien ia sdang ka Nangkiew Irat ka la pyndonkam hok ia kane ka kabu ba ka la ioh ba kan da pynkhih nyngkong ia ka jar, ha kaba u Wallamsuk Nongkhlaw u la lah ban sam lyngba ia ka defend line ka ka Nongkseh bad ha ka por ba biang ban pyllait ia ka bol sha u Jefferson Paskyntien, uba la lah pat ban pynpar lyngba ia u Daraphun rang ap kol ka Nongkseh ban pynkhih ia ka jar ha ka minit kaba ar
Hadien ba la shah tam shakhmat da shi kol, ka Nongkseh SSCC ka la pyrshang ba kan wanphai sha ka jingiakhun kaba hangne ka la sdang ba kan iakhun tyngeh tad haduh ba kan da ioh ruh ia ki kabu ba kan shut ia ki corner kum shi bynta ban ioh ban pynphai noh shwa ia ka shi kol ba la shah tam, hynrei ka kabu ksiar bala mih paw ka wan lyngba u Kitboklang Pale uba la ioh ia ka kabu kaba paka ban pynkhih ia ka jar ha ka minit kaba 33.
Ka kylla miet ka dei ka bynta ba ka Nongkeh SSCC ka la ialeh ba kan nion beit shakhmat , katba na ka liang ka Nangkiew Irat ruh, kim shim la duh mynsiem, da kaba ki la iakhun tyngeh ban shah katba lah naka bynta ban iakhaid na ka ne ka jingiakhun.
Hadien kane, ka suin bneng ruh kynsan ka la sdang ba kan kem dung bad ia ki minit ba la pynjlan ia ka jingiakhun, la hap ruh ban thang ia ki floodlight, kaba hangne hi ka jingiakhun ka long kaba khluit bha, hynrei ha kaba kut ki ar kynhun ki la hun ka mynsiem ban shu ia sam mar shi point.
Da kane ka nam iakhaid, ka Nongkseh SSCC ka bat ia ka kyrdan kaba ar hadien ba ka la ioh ba kan khur 4 point katba ka Nangkiew Irat ka la ioh ba kan khur 1 point.
Ka jingiakhun kaban wan kan dei haduh ka sngi Thohdieng ha kaba ka Mawlai SC kan iakhun pyrshah ia ka Shillong Lajong FC kaban long ha ka por 6 baje janmiet.
