Shillong, Nailar 19 : Ki nongshongshnong ka shnong Bangla Sohphie kila kyrpad ia u Lat ka Jylla ban ai jingmynjur ia ka KHADC Amendment Rukesm 2024, ba kwah ban pynkynriah ia ki EPIC jong ki na Mairang sha Nongspung-Sohiong Constituency.
Ha ka dorkhas bala aiti ha ka sngi Balang, ka Dorbar Shnong Bangla Sohphie kala pyntip ba ka KHADC kala dep mynjur ia ka jingtyrwa ban rah noh ia ka thup electoral roll ka shnong n aka 23-Mairang sha ka 22-Nongspung-Sohiong.
Kat kum ka jingong ka Dorbar Shnong, ka jingpynbeit ba mynta hapoh ka Mairang Constituency kala wanrah shibun ki jingeh ia ki trai shnong ha ki kam elekshon bad ban pyndep ia ki kam ba donkam bad ka Sorkar.
Ka Dorbar kala pynpaw ba ka jingpynhap ia ka Bangla Sohphie bad ka Sohiong Constituency ka kham iahap bha namar ka jingdon marjan ka jaka bad ka jingiadei ha ka imlang sahlang.
Kan pynthikna ruh ia ka jingsynshar khadar kaba kham biang bad ka jingmihkhmat na ka bynta ki nongshongshnong.
Ka Shnong ka pynpaw ruh ba kane ka sienjam ka long kat kum ki kyndon ka Sixth Schedule bad ai khublei ia u Lat ka Jylla namar ka jingkyrshan ban iada ia ka hok jong ki riewlum trai muluk.
