Dawa ka CoMSO ia ka Sorkar ban leh eiei mardor halor ka ST Order, ILP | Maham ban iakhih

Shillong, Nailar 18: Ka Confederation of Meghalaya Social Organizations (CoMSO) ka la dawa na ka Sorkar Meghalaya ban shim khia mardor bad buh da ka por ban pyntreikam ia ki ar tylli ki jingdawa ba kongsan – ban pynkylla ia ka Constitution (Scheduled Tribes) Order, 1950 bad ban pyntreikam ia ka Inner Line Permit (ILP) ha ka Jylla.

Ha ka kyrwoh, ka CoMSO ka la ong ba baroh ar tylli ki jingdawa ki mih na ka jingsngewkhia kaba la slem bha halor ka hok jong ki trai ri trai muluk, ka jingshngain jong ki briew, ki jaka puta, ka iohkam iohjam, ka jingmihkhmat ha ka sain pyrthei bad ka jinglong tynrai jong ka kolshor.

Halor ka ST Order, ka CoMSO ka la kam ba ka Sorkar ka treikam hynrei ka la maham ba lada nang pynslem shuh shuh ban wanrah pynkylla daka ain, kane ka kam ruh kan shu sahteng.

Ka la ong ba ki Committee bad ki jingialang kim dei ban long ka daw ban pynslem bad ka la dawakhot ia ka Sorkar ban pynpaw paidbah ia ka jinglong bad ki jingai jingmut ba mynta, ryngkat bad ki sienjam ba la dep ban shim bad ka Sorkar Pdeng khnang ba ia kane ka kam yn lah ban shim iaka rai thikna lyngba ka rukom treikam kaba biang jong ka riti synshar.

“Ka jinglong kyrpang jong ka riti synshar bad ka jingbun briew jong ka Meghalaya ka pynlong ïa kane ka mat kaba kyrkieh,” ong ka CoMSO, da kaba bynrap ba ki briew ki dei hok ban ïoh ïa ka jingshai halor kane ka mat.

Haba iadei bad ka ILP, ka CoMSO ka la pynpaw biang ïa ka jingdawa jong ka ban pyntreikam mardor, da kaba pynshai ba ka rukom treikam kam dei ban khanglad ïa ki kam jngohkai pyrthei, ki kam khaii, ka jingpule ne ka kam kaba dei hok, hynrei ban pynbeit bad buddien ïa ka jingrung bad sah jong ki briew kiba nabar, ryngkat bad ki kyndon kiba biang na ka bynta ki nongwan jngohkai pyrthei kiba wan daki lynti ka ain.

Haba kdew ba ka Ïingdorbar Thawaiñ ka Jylla Meghalaya ka la dep ban ai ka jingkyrshan ïa ka ILP, ka CoMSO ka la ong ba ka por ka la dei ban ïaid shakhmat ban pyntreikam.

Ka la kyntu ia ka Sorkar Jylla ban rah ia kane ka kam bad ka Sorkar Pdeng ha ka kyrdan kaba ha khlieh duh bad ban ioh ia ka jubab kaba pura.

Kala dawa naka Sorkar Jylla ban shim jingkhein iaka por ba dei ban pyntreikam na ka bynta baroh ar ka jingpynkylla ia ka ST Order bad ka ILP, khnang ba ki briew kin tip ia kaei kaba ki dei ban khmih lynti.

“Ki paidbah ka Meghalaya ki la ap slem bha ban ioh ia ka sienjam kaba kongsan”, la ong ka CoMSO.

Ka la maham ba lada ka Sorkar ka dang bteng ban pynslem, ka seng kan hap ban iamir jingmut bad ki nongiashim bynta bad ban shim daki ki sienjam ba tyngeh ban pynbor pynurlong ïa ki ar tylli ki mat jingdawa.