Shillong Nailar 18: Ka Sorkar Meghalaya kala thied ia ka jaka kaba 96 akar ha Rongalgre, East Garo Hills, kaban long ka jaka kaba shirta ban pynlong ia ka Me’gong Festival kaban don ruh ia ka jingshna pyninam ia ki shnong jong ki Khasi, Jaintia bad Garo ban ailad ia ki nongjngohkai ba kin mad hi dalade ia ka jingim jong ki paid riewlum.
U Myntri Rangbah ka Jylla u Conrad K Sangma ula pynbna ia kane ka projek hynne ka sngi Baar haba kren ha ka jingplie ia “Ki Dienjat – Revisiting the Roots” ha Taraghar State Guest House.
“Shen, hooid watla kane ka dang dei tang ka jingthmu ban pynwandur ne Planning Stage, hynrei nga sngewkmen ban pyntip ba ngi dang shen ngi lah thmu ban don noh ia la ka jong ka jaka na ka bynta ban pynlong ia ka Me’gong Festival ha ka jaka kaba khot ka Rongalgre ha East Garo Hills,” ong u Sangma.
“Kumba 96 akar ka jaka lah dep ban thied bad ngi lah sdang ia ka kam. Ha katei ka jaka, ngi lah pyrkhat ban buh ia bun tylli ki shnong jong ki jaidbynriew ki bapher bapher ki jong ngi” ula ong.
U Myntri Rangbah ula ong ba katei ka jingthmu ka long ban thaw ia ka jaka kaba don kyrhai da ka kolshor kaba ki nongleitkai ki lah ban sah kum ki jaidbynriew haba ki leit jngohkai.
“Ka jingthmu ka jong nga, ka long haba ki briew ki leit sha ka Me’gong festival, kin lah ban leit bad sahkai ha ka shnong Khasi. Haba phi leit hangtei, kin don ki briew kiban riam bad phin ioh ruh ban riam kum u Khasi. Phin sah hangtei kum u Khasi uba sah ha ki shnong ki thaw bad phin ioh mad ha baroh ki liang kumba long ka shnong Khasi bad ka kolshor, da kaba sah hangtei” ong u Sangma.
Ula bynrap ba ia kum katei ka shnong kan don ruh na ka bynta kiwei pat ki jaidbynriew. “Kumjuh ngin don ruh ia ka shnong Garo, Ngi don ia ki bapher Jaintia, Pnar, War — jer phi ia ka kyrteng kat kaba lah. Ngin don ia ki shnong ki bapher bapher ha katei ka jaka, khnang ba ngin lah ban ailad ia kiba wankai bad ki nongjngohkai kiba wan na kylleng ki jaka ba kin shemphang” ula ong.
Da kaba pyniasoh ia kane ka projek bad ka Cultural Policy ka Jylla, u Sangma ula ong ba kum kine ki sienjam ki long kiba kongsan ban pynneh ia ka jinglong tynrai hapdeng ka jingkylla sted jong ka por.
“Ka daw balei ba ngin leh ia katei, kadei namar ba ngi lah ngeit skhem na ka bynta ka jong ngi bad ka imlang sahlang, jaidbynriew bad ka jylla, ka long kaba kongsan bha ia ngi ban pynkhreh, ban pyniasoh bad la ka tynrai, ban lah ban thaw ia la ka jinglong tynrai namar ha kaba kut jong ka sngi kadei kaei kaei kaba kongsan” ula ong.
“Ka long shuh shuh kaba kham kongsan ha kaba iadei bad ki pateng jong ki samla kiba don mynta, kiba don bynta ha kiba bun ki bynta jong kane ka pyrthei, ha kaba iadei bad ka social media. Ka long kaba suk bha ban jah lynti noh na kaei kaba ngi long. Kumta nga sngew ba ka long kaba kham kongsan ba kum kine kiei kiei dei ban rah shuh shuh bad dei halor kane, nga kwah ba ki samla ki dei ban iadonktilang” la ong u Myntri Rangbah.
