Shillong Nailar 16: Ia ka Independence Day kaba 80 jong ka ri India la rakhe hapdeng ka jingshongkun bad jingkmen bad da ka mynsiem ieid ri, da kaba lumlang ia 1,000 ngut ki heprit kiba sah ha ki iing kiba shu ker malu mala ne Slum bad ki heprit kiba na ka shnong Mawlynrei, Mawlong, Pongkung bad Rangmen.
Ia kane ka prokram la pynlong da ka SPARK, Meghalaya, ban ai ia ka rynsan na ka bynta ki heprit na ki jaidbynriew kiba la shah iehbeiñ ban iashimbynta ha ka jingrwai ia ki jingrwai ieid ri, ban shad, ka jingpyninam ia ka kolshor, ki jingai jingkren bad ka jingpynsngewthuh halor ka jingrakhe ia ka Independence Day bad ka jingiatylli hapoh ka ri.
Ki heprit kila iashimbynta da ka jingkmen bad jingshongshit ban pyni ia ka jingieid ia ka ri lyngba ka jingpynbyrngia ka jongki.
Ka nongseng jong ka SPARK ka Shima Modak kala ong, ba kane ka prokram kadei da ka jingthmu ban plielad ba man la ki heprit, khlem da shim na kano kano ka jaidbynriew ne la kidei kiba wan ba ka iing ba kyrduh ne don ba don ba em, kidei ban ioh ia ka lad ban angnud, pule, iashimbynta bad ban noh synniang na ka bynta ka lawei jong ka ri.
Kawei na kaba kongsan jong kane ka jingrakhe kadei ka jingshim ia ka smai ban ieid ri da ki nongiashimbynta.
Ki heprit kila kular ban long ki nongshong shnong kiba don ia ka jingkitkhlieh bad ban trei na ka bynta ban tei ia ka ri India kaba bha tam, kaba bit ba biang, ba shngain, kaba iaid shaphrang, kaba suk ba sain bad kaba kiew irat bad ban pynlong kum ka ri kaba biang tam ha ka pyrthei.
“Ka jingrakhe kam dei satia tang ka jingkynmaw burom ia ka jingioh laitluid ka ri, hynrei ka jingpynkynmaw ba ka lawei jong ka ri jong ngi, kadei na ka bynta iwei pa iwei i heprit” ong ka Modak.
“Da kaba pynkup bor na ki jaidbynriew kiba dang sahdien bad ban saindur ia ka jingskhem jingmut ka jongki, ka jingkordor bad ia ka jingmut jong ka jingkitkhlieh, ka imlang sahlang ka lah ban thaw ia ka ia ka ri India kaba khlain bad kaba salonsar” kala ong.
Ka SPARK, Meghalaya kala pynapw ia ka jingsngewnguh ia ki heprit, ki kmie ki kpa, ki Volunteer, ki nongkyrshan bad ki nongialam shnong kiba la pynlong ia kane ka jingrakhe kaba jop bad seisoh.
Ia kane ka prokram la pynkut da ka jingshim ia ka jingkular ban don ia ka jingiatylli, ka jingioh kaba mar katjuh, pule puthi, jingshngain, jingkiew shaphrang bad jingkiew ka roi ka par ha ka ri, ha kaba kine ki nongpyniaid kila kyntu ia ki nongiashimbynta ban rah shakhmat ia ka jingkordor jong ka jinglaitluid bad ka jingkitkhlieh.
