Itanagar, Nailar 16: Ki don sanngut ki shipai Army kiba la jah rngai hadien ka jingther u lapbah ba jur ha ki bynta jong ka Pashu Pani jong ka Anini ha Arunachal Pradesh ha ka janmiet jong ka sngi Thohdieng kaba la wanrah ïa ka jingtwa khyndew kaba jur bha, ong ki heh ophisar.
“Mar mar la pynlong ïa ki kam bad wad bad pynlait im mardor ïa arngut ki shipai.Ki kynhun pynlait im kiba bun la wan stet bha na ki jaka ba marjan, da kaba ïakhun pyrshah ïa ka jinglong ka suiñbneng kaba sniew bad ka jingshlei um, ban poi sha katei ka jaka bad ban ïadon bynta lang ha ki kam pynlait im.San ngut ki shipai ki dang jah rngai,” ong uwei u heh ophisar.
“Ka jingwad bad jingpyllait im kaba la ïatreilang ka dang ïaid mynta ban wad bad pynkynriah ïa ki briew kiba shah ktah na katei ka thain,” u la ong.
La pyndonkam ruh ïa ki tiar liengsuiñ jong ki shipai ban pynkhlaiñ ïa ka jingpyrshang ban pynlait im bad ban pynsuk ïa ka jingpynkynriah mardor ïa ki nongsumar.“Baroh ki lad ki lynti kiba don la pyndonkam ha ka kam pynlait im bad ai jingïarap kaba ïatreilang,” ong une u heh ophisar.
Ka jingwad bad jingpyllait im ka dang ïaid shakhmat katkum ka jingthmu ba kongsan, katba dang ap ïa ki jingtip ba bniah hadien ka jingpynshisha ïa ka jinglong jingman.
Katba ha Upper Subansiri district, ka jingtwa khyndew kaba jur ka la lynshop ia ka jaka shna surok ha Keojaring-Byaching, ha kaba la tep ia ki katto katne ngut ki briew hapoh ki thliew.Ha katei ka jingjia la iathuh ba ki don saw ngut ki briew kiba la tip kyrteng kum u Tadu Baki, u Taji Rai, u Markosh Basumatari bad u Babul Ali kiba la khlad na katei ka jingjia.
