Merapani, Nailar 16: Ka sorkar Assam ka dang pynkhreh ban sdang biang ia ka jingkyndang ia ki 59 tylli ki longing, kiba sah ha No. 2 Negheribil, ha khappud Assam-Nagaland, hadien jong ka rai jong ka Supreme Court, kaba plie lad ia ka bor synshar jong ka Golaghat district bad ka Forest Department, ba kin iaid shakhmat.
Ki heh sorkar ki la leit jngoh ia katei ka jaka sah ha khappud ha ka sngi U Blei bad ki la ai ia ka notice kaba khatduh sha ki longiing kiba dang sah, da kaba kyrpad ia ki ban mih noh hapoh ka 18 tarik u Nailar.Ki bor pyniaid ki la ai nombar ia ki iing bad ki la pynlong ia ka jingjurip bniah ia katei ka jaka da kaba pyndonkam da ki drone camera kum shi bynta ban pynkhreh ia katei ka kam.
Ka jingthmu ban pynkynriah ka wan hadien ka jingiakhun ain kaba la slem bha.Ka Forest Department kham mynshwa ka la beh shnong ia ki 205 tylli ki longiing na No. 2 Negheribil, katba kiwei pat ki 59 tylli ki longiing ki la ioh ia ka jingpynsangeh hadien ba ki la leit sha ka Gauhati High Court bad hadien kata sha ka Supreme Court.
Ki heh ophisar ki la ong ba lada ki longïing kim mih noh ha ka por ba la buh, ka bor pyniaid district jong ka Golaghat ka lah ban pynlong ïa ka jingkyndang ïa ki longïing.
Kane ka wan hapdeng ka jingpyrshang ba thymmai jong ka Assam bad ka Nagaland ban khanglad ïa ka jingïakynad pud jong ki kaba la slem bha ban nym nang jur shuh shuh.
U Symbud Myntri Rangbah ka Nagaland uba dei ruh u Myntri ba dei peit ïa ki kam pohïing bad khappud u Y. Patton u la ïakynduh ïa u Myntri Rangbah ka Assam u Himanta Biswa Sarma ha Guwahati ha ka 29 tarik Naitung ban ïakren halor ka jingïadei hapdeng ki jylla, ka jingïatreilang bad ka jingthmu wad umphniang bad gas ha shilynter khappud.
U Patton u la pynskhem ba dei ban pynbeit ia ki jingeh ha khappud lyngba ka jingiakren, ka jingiatreilang hapdeng ki ar tylli ki jylla, katba burom ia ki jingiateh ba la don lypa, kynthup ia ka jingiateh ba shipor jong u snem 1972.
Ka Nagaland ka la pynskhem ruh ba watla ka kyrshan ïa ka jingleh pyrshah ïa ka jingwan rung be-aiñ, ki jingpynkynriah bad kiwei kiwei ki kam ha ki jaka khappud kiba khia dei ban pynlong da ka jingïatreilang bad ki bor synshar jong baroh ar tylli ki jylla ban ïada na ka jingïakynad.
Ka sienjam kaba thymmai namar kata ka buh jingmut ym tang ha ka jingpynbna ain ban pynkynriah hynrei wat ha ka rukom ba ka Assam bad ka Nagaland ki pyniaid ia ka jingtreikam ha madan.
Da ka jingwan jong ka por ba la buh mynta, la peit bniah bha ïa ka jinglong jingman ha No. 2 Negheribil namar ba baroh ar tylli ki jylla ki wad ban pynïahap ïa ka jingpyntreikam pyrshah ïa ka jingwan rung tuh bad ka jingkular ba la pynpaw jong ki ban pynneh ïa ka jingsuk ha shilynter u pud u sam ba ïakynad.
