Shillong, Nailar 16 : Ka Shnong Mynriang ba hap hapoh ka Mawryngkneng C&RD Block, East Khasi Hills, kala rakhe ia ka Independence Day ka Ri ha ka rukom kaba pher bha da kaba pynlong ia ka Watermelon Festival ba shisngi, ka tamasa ba nyngkong eh ban long ha Jylla.
Kane ka tamasa kala khring ia bun bah ki briew ym tang na ka shnong Mynriang hynrei na kylleng ki jaka, kaba la lah ban pyniaid iew palat 4 lak ton u soh watermelon uba la rep hi da ki nongrep ka shnong Mynriang.
Ia kane ka tamasa la pynlong da ka Dorbar Shnong Mynriang ha ryngkat ka jingiatreilang bad ka National Peoples’ Party Farmers Front. Ka jingthmu jong ka tamasa ka long ban kyntiew ia ka shnong ka thaw bad ka ioh ka kot ki nongshongshnong nalor ban pynpaw nam ia u soh watermelon ba pynmih ka shnong.
Nalor u soh watermelon ki paidbah kila wanrah ruh ïa ki jingri jingdup, ki soh bad ki jhur ba ki thung hi kum u Sohtrun, ki pathaw, ki syiar bad kiwei kiwei.
Ka shnong kum shi bynta ban lah ban pyniaid iew ïa une u soh kila khot lang ruh ïa ka seng ki nongkhaïi jhur ki ban iarap bad plie lad lem ia ki paidbah nongrep soh jong ka shnong ba kin lah ban pyniaid iew ia u soh uba ki thung hi.
Na ka liang jong ki paidbah nongrep da ka dur ba phuh sam rkhie katba dang lut ki soh na ki dukan, mar kila phah leit kheit biang na lum ban wanrah sha kane ka tamasa namar ka jingtuid jong ki paidbah ban thied ia une u soh ka jur bha.
Ki kali ba wan kit ia une u soh ki kynthup naduh ki pickup, ki auto trok bad kiwei kiwei de kiba la thied ha ka dor T. 35 shi kilo bad ha kane ka sngi la sakhi ruh ïa ki nongwan jngohkai pyrthei kiba la wan poi ha kane ka shnong.
Na ka liang u Bah Bristar Mawthoh bad u Bah Dundee Cliff Khongsit kiba wan ban mih khmat na ka seng ki nong khaïi jhur kila pynpaw ba ki kloi ban ïarap ia la ki jong ki paradoh para snam na ka bynta ban pyniaid iew ia u soh jong ki.
Shuh shuh kila kyrpad ïa ki paidbah ba kin thung da ka jingkhein, ioh long kumba jia ia ka dor u kubi namar ba la bun than eh kiba pynmih kumba la jia mynta u snem ha ka ba la hap ban shu sam ei sha ki briew namar ka jingbym iaid dor.
Na ka liang u Chairman jong ka NPP Farmers Front u Bah Himalaya M Shangpliang haba kren u la pynpaw ba tang na u soh Watermelon, ka shnong Mynriang mynta kala paw nam bha bad ka long kaba donkam ban pynlong ïa kum kane ka tamasa man la u snem khnang ba ki nongrep ki kiew irat ha ka ioh ka kot.
U Bah Shangpliang u la ong ruh ba la shem snem un pyrshang ban pynkoh nguh ïa u Myntri Rangbah ka jylla Conrad K Sangma ban wan hi ha kane ka shnong ban wan mad ïa u soh water melon.
Ula kular ba un sa iakren bad u Myntri Rangbah halor ka dorkhas ba la ai da ka shnong halor ka jingdonkam, kum ka jingpyniaid iew ia une u soh, ka cold storage khnang ba u soh un neh slem bad kiwei kiwei de ki jingdonkam.
