Shillong, Nailar 14: Ka Meghalaya High Court ha ka sngi Thohdieng kala pynwai noh ia ka mukotduma bala mudui da u kyrtong ka VPP prof Batskhem Myrboh hadien ba ka Executive Council ka NEHU kala rai ban ai NOC ba un iakhun ia ka elekshon shiteng samoi ka Shillong Lok Sabha.
Haba bishar ia ka writ petition, ka single bench u Justice HS Thangkhiee kala pynpaw ba da ka rai jong ka Council, ym don eiei shuh ban dang hap bishar.
“Naba lah dep rai da ka Executive Council ban ai NOC iakhun ia ka elekshon shiteng samoi ka Shillong Lok Sabha sha u Dr Myrboh, ym don eiei shuh ia ka Iingkashari ban hap pyrkhat ha kane ka writ petition” ong ka Iingkashari ha ka hukum.
Ka Iingkashari kala buh ha ka jingthoh ia ka copy jong ka rai ka Executive Council ba 04.08.2026 bad pynlong ia ka kum shibynta na ki record jong ka mukotduma.
