Shillong, Nailar 13 : Ka Sorkar Jylla kala rai ban pynkha ia ka FCRA Cell hapoh ka tnad kam Pohiing ban iarap ia ki kynhun ha ka Jylla bad ka jingaplai bad pynthymmai ia ka Foreign Contribution Regulation Act, pynbna u Myntri Rangbah Conrad K Sangma ha ka sngi Palei.
Haba kren sha ki nongthoh khubor, u Myntri Rangbah ula iathuh ba ia kane ka Cell yn sa pynkha ha ryngkat ka jingiasyllok bad ka Sorkar India bad kan pynbeit ia ki jingeh hala ka Jylla ha ka jaka ban pynbor ia ki kynhun ba kin leit shaduh sha Delhi.
“Nga kwah ban pyntip sha phi ba ka Sorkar Jylla kala rai ba ngin pynkha ia ka FCRA Cell hapoh ka Tnad kam Pohiing ka Sorkar Meghalaya. Hooid ia kane yn leh ha ryngkat ka jingiasyllok bad ka Sorkar India” ong u Conrad.
U iathuh ba ka jingthmu jong kane ka Cell ka long ban iatreikam lang bad ka Sorkar Pdeng bad ban pynbeit ia ki jingeh ba iakynduh da ki kynhun bapher bapher.
“Ka jingthmu jong kane ka Cell ka long ban iarap ha ka jingiatreikam bad ka SorkarPdeng ban khmih ia ki lynti kiba biang ha kaban weng ia ki jingeh bapher bapher bala mad da ki kynhun jong ngi haba phai sha ka jingpynthymmai ne aplai ia ka FCRA kaba lah ban pynbeit hangne ha Shillong lane ha Tura ne ha Jowai khlem da hap leit shaduh sha Delhi” ula ong.
U Conrad ula bynrap ba ula dep iakren ia kane ka kam bad u Secretary ka Ministry of Home Affairs bad ba ia ki lad ki lynti yn sa pynbeit ryngkat ka jingpyniadon bynta ia ki Ophisar ka Sorkar Pdeng ba kin ai jingkyrshan na ka por sha ka por.
U Myntri Rangbah ula ban jur ba ka Sorkar Jylla kan shim ia ka sienjam ban buh ia ka Cell, bad ka lah ban plie ha bun tylli ki jaka lada donkam.
U Conrad ula wer ruh ia ki seng sain pyrthei ba kin ieng rasong khlem da leh politics halor kane ka kam, haba ong ba kaba donkam hakhmat eh ka dei ban long ka jingpynbiang tarajur ia ki jingteh kyndon bad ka jingdonkam jong ki kynhun treikam kiba trei na ka bynta kiba duk.
Ula pynpaw ba katba ka jingkhmih bniah bad jingteh kyndon ia ki pisa bar ri ka dei ka kam ba ju leh hapoh ka ri, ka Jylla ka dei ban pynthikna ba ki kynhun na Jylla kim dei ban shah ktah.
“Kane kam dei ka por ban leh politics, hynrei ka por ban iatreilang ha kaban pynthikna ban gin lah ban wanrah ia ka lynti ban weng ia ki jingsngewkhia jong ka SorkarPdeng haba phai sha ka jingkhmih bniah bad teh kyndon ia ka pisa ba wan nabar ri, kaba dei ka rukom ba ju leh ha baroh kawei ka pyrthei” ula ong.
