Kular u Amit Shah ia ka UDP | Ka FCRA Amendment kan treikam mynta shakhmat, la phah sha ka JPC

Shillong, Nailar 12: U Myntri kam Pohiing ka ri u Amit Shah ula pynthikna ia ka kynhun na ka seng UDP ba ka jingthmu ban pynkylla ia ka Foreign Contribution (Regulation) Act kan ym dei kaban treikam ia kaei kaba lah dep jia mynshwa ne Retrospective bad ia ka Bill yn sa phah shwa sha ka Joint Parliamentary Committee na ka bynta ka jingiasyllok kaba iar.

U Nongialam ka UDP bad u Myntri Sorkar u Bah Lahkmen Rymbui, uba la ialam ia ka kynhun sha New Delhi ha ka sngi Balang, ula ong, ba ka seng kala pan ia ka lad ban iakynduh bad ban iakren ha kaba iadei bad ka jingsngewkhia ha kaban pynkylla ia ka FCRA kaban pynmih ia ka jingeh na ka bynta ka jylla Meghalaya.

“Katkum ka jingsngewthuh ka jong nga, ka jingthmu ka Sorkar Pdeng ban pynkylla ia ka FCRA kan pynmih ia kiba bun ki jingeh lada kam don kano kano ka jingshai kdar. Dei halor kane ka nongrim ngi lah pyrshang ban ioh ia ka lad ban iakynduh ia u Myntri Kam Pohiing ka ri ban iakren ia kane bad ban sngewthuh kham bha” ong u Bah Rymbui.

“Nyngkong, wat lada ia kane ka ain la mynjur, kan ym treikam ia kaei kaba lah dep jia hynrei kan treikam beit noh nangne shakhmat. Ka baar ia kane ka Bill yn sa phah sha Joint Parliamentary Committee khnang ba baroh kiba donbynta kin ioh ban pynpaw ia ki jingsngew ki jongki, khnang ba kane ka ain kan ym ktah iano iano ruh” ula ong.

Kane ka kynhun kala kyntu ba lada ia ka Citizenship Amendment Act lah ban ym pyntreikam ha Meghalaya, kumta ia ka FCRA ruh dei ban leh lang kumjuh, da kaba pynpaw ia ka jingsngewkhia halor ki bor kiba dei khmih bad ia ka jaka.

U Amit Shah ula pynshai ba ka jingpynkylla kam dei satia kaba thmu ban ktah ne ‘Target’ ia kano kano ka jaidbynriew bad ka pynpaw ba tang kumba 16% na ka jingantad kaba T.22,000 Klur kaba wan man la ka snem na shabr ri kadei kaba leit sha ki jaka treikam jong ki niam Khristan.

“Ka jingialang kala long kaba seisoh bad nga pynpaw ia ka jingsngewnguh ia u Myntri Kam Pohiing ka ri uba la sngap bad shah shkor bad uba la pyni ruh ia ka lynti kaba ka Sorkar Pdeng kan iaid nangne shakhmat kumno ba kan leh halor ki mat kiba kongsan kiba iadei bad ka FCRA, jingtih dewiong, MRSSA, ktien Khasi & Garo bad kiwei kiwei” la bynrap u Bah Rymbui.