Nongstoin, Nailar 11 : Arngut ki shipara kiba dei ki rang ialehkai phutbol, kila duh noh la ka jingim na ka jingpom pyrthat katba ki dang ialehkai phutbol ha ka lympung Independence Cup, kaba long ha madan Makrein, Mawsnapwir, West Khasi Hills.
Kane ka jingjia kala jia ha ka por 3 baje janmiet, ong ki Pulit ka Nongstoin Police Station haba pyntip ba ki don ruh sa phra ngut ki ba mynsaw na kane ka jingpom pyrthat kynthup ki nongpyniaid ia ka lympung.
Ki pyntip ba kine ki arngut kiba iap ki kyrteng u Mickson Kshiar ba 18 snem bad uwei pat u dei u Cleverson Kshiar ba 19 snem. Kine baroh arngut ki dei na ka shnong Lawrapha, West Khasi Hills.
Ki Pulit ki pyntip ba kine ki shipara ki dei kiba shu wan shong sahwai ha ka shnong Lawrapha ban leit skul. La iathuh ba katba ka jingialehkai phutbol ka dang iaid, u slap uba jur ula ther kynsan bad mih ka jingpom pyrthat.
Kine ki shipara ki dei kiba ialehkai na ka shnong Lawrapha-kaba iakhun pyrshah ia ka Marskuin ha kane ka jingialehkai.
Ki Pulit ki pyntip ba ia kiba mynsaw la pynkit noh sha Civil Hospital, Nongstoin bad sha St Joseph Hospital ban ai jingsumar.
