Pynskhem ka Iingkashari ba pynkhun ka KHADC ia ka ain ban sospon ia u Syiem Mylliem

Shillong, Nailar 11 : Ka Iingkashari Meghalaya High Court ha ka sngi Ba-ar, kala shem ba ka KHADC ba synshar da ka Voice of the People Party (VPP) kala pynkhein ia ka ain ha ka jingsospon ia u Syiem ka Hima Mylliem Pa’iem Manik Syiem.

Haba pynbna ia ka hukum jong ki mukotduma WP© 232 bad 233 u 2026, ka Iingkashari u Justice W Diengdoh kala ong ba ka KHADC kala pynkhein ia ka kyndon 7 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007.

Ha kane ka mukutduma, ka Iingkashari kala bthah ia ka KHADC ba kan thungbiang ia u Pa’iem Ainam Manik Syiem kum u Syiem ba pura ka Hima Mylliem haba kdat noh sharud ne pyniap ia ka hukum bat hung ia u Bah Alban Fredrick Syiem kum u Acting Syiem.

Ka kyndon 7 jong ka KHAD (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007, ka kren shai ba kano kano ka jingujor pyrshah ia u Syiem ka dei ban leit shuwa sha ka Dorbar Hima bad dei ban sngap ia ka jingpynshai u Syiem hashuwa ban sospon lane weng ia u.

“Ka Proviso 1 jong ka kyndon 7 ka Act u 2007, ka ong ba kano kano ka jingujor pyrshah ia u Syiem ka dei ban leit shuwa sha ka jingtip jong ka Dorbar Hima. Ia kane ym shym la leh satia. Ka kam jong ka KHADC ban sospon ia u nongmudui kam ieng satia hakhmat ka ain” ong ka Iingkashari.

Halor ka jingthung ia u Acting Syiem, ka Iingkashari ka ong ba ka kyndon 8 jong ka Act 2007, ka kren shai ba dei ban thung ia u Syiem Khynnah ne Deputy Syiem haba sospon ia u Syiem.

Ka KHADC kala thung pynban ia u Alban Fredrick Syiem, haba pynpaw ba u Syiem Khynnah Mansan Manik Syiem u dei u para jong u Syiem ba shah sospon.

Ka Iingkashari kala ong ba ka jingpynbna (notification) ka KHADC ka dei kabym shong nongrim kat kum ka ain bad ruh ka jingsoi tang da uwei u Executive Member, kaba long khongpong ia ka kyndon 25 jong ka Act.

Da ka jingkdat noh sharud ia ka hukum sospon ia u Syiem, ka Iingkashari ka ong ba ka mudui u Syiem Khynnah kam donkam shuh ban bishar bad un dang bteng ban long u Syiem Khynnah.