Shillong, Nailar 11: U Nongtem Guitar bad u nongthaw jingrwai ba pawnam na ri Poland u Marcin Patrzałek ula wanpoi ha Meghalaya ha ka sngi Nyngkong kum shi bynta ban pynbyrngia ia ki paitbah kum shi bynta jong ka Marcin, Art of Guitar Tour 2026.
Kane ka Concert kan long ha ka 12 tarik u Nailar ha Lariti Performing Centre, Mawkasiang.
Da kaba iapbiej ia ka jingitynnad ka Jylla haba shong kali na kad liengsuin, u Marcin ula ong, “Ngam lah ban sangeh ka ring video da ka phone na ka jingkhang iit katba nga dang shong kali tang namar ka jong ka mariang, katno ka jingitynnad ka long ia nga. Kumta nga sngew ba nga don ha kawei pat ka bynta jong ka pyrthei ia mynta hi”.
Une u nongtem guitar, uba la bna nam ban tem ha ka rukom kaba bun ia ki sap ki phong, ula ong, ba u dang khmih ban ialeh ban tem hakhmat ki paitbah jong ka ri India. Ula pynpaw ruh ia ka jingkyrmen ba kane ka jingwan ka jongu kan iarap ruh ia kiwei pat ki nongtem nongput ba kin iaid na kane ka lynti hi bad ban kyntiew ia ka jingsam mar kylliang ia ka kolshor.
Kum shi bynta jong ka jingiadonbynta bad ka Shillong, u Marcin un pynlong ruh ia ka Workshop bad Jam Session bad ki samla ka thain bad ki nongtem hapoh jongka Chief Minister’s Meghalaya Grassroots Music Program ne ka CM-MGMP.
Ula iaroh ia ka sienjam kaban plie lad lyngba ka rynsan na ka bynta ki samla ban kin ioh jinghikai bad ka jingiatreilang.
Ha ka 12 tarik u Nailar yn pyninam ruh ia ki samla nongrwai bad nongtem, ha kaba ka CM-MGMP’s ‘Achiever of the Month – Music Edition’ ka Chegim Durama na Garo Hills ryngkat bad ka Leo Boys na Khasi Hills bad ka Larger Than 90 ka Jaintia Hills, kin kiew lang ha ka rynsan bad u Marcin.
Kiwei kiwei ki nongtem bad nongrwai jong ka MGMP ruh kin ioh ia ka lad ban pyni ia ka sap ka jongki.
U Myntri Rangbah ka Jylla u Conrad K Sangma ula ong, ba kane ka jingiatreilang ka pyni ia ka jingiohi jngai jong ka jylla ban rah ia ka sap ka phong ki nongrwai bad nongtem ka Meghalaya sha ki nongpeitkai kiba don ha kylleng kane ka pyrthei.
Ia kane ka concert yn pynlong da ka Department of Tourism, ka Sorkar Meghalaya ryngkat bad ka CM-MGMP bad ka Chief Minister’s Office. Kane ka prokram kadei shibynta ban ialeh ban tynruh ban buh ia ka Shillong ha ka kyrdan kaba ju tip kum ka “Jaka jong ki Guitar” kum ka jaka pdeng ia ka tem ka put, ka kolshor bad kam jngohkai.
Ki ophisar kila pyntip ba ka CM-MGMP kala long ruh ka rynsan ban kamai jakpoh da kaba ailad ban tem bad rwai ha ki jaka jngohkai kiba don ha kylleng jongka jylla.
