Shillong, Nailar 10: Ka lehniam Behdeinkhlam jong ka Seinraij Ialong kala kut noh ha ka sngi Nyngkong ha Aitnar ha kaba ki riewngeit kiba na Raij Ialong, Wahiajer bad Nongkyllep kila wan ban buh jingduwai ban beh ia ka khlam jingpang bad ia ka sniew ka smeh.
Da ki hajar ngut kila wan ban iashimbynta ha kane ka shad da kaba bud ryntih ia ki sur kiba mih na ka ksing bad ki tangmuri bad ka jingpyninam ia ki tabut kiba la shna bad pynitynnad da ki rong ki rup ki bapher bapher kiba don ruh ia ki kyrwoh na ka bynta ka imlang sahlang ha ka pung ba kyntang.
U Symbud Myntri Rangbah ka Jylla u Bah Sniawbhalang Dhar, uba la iashimbynta kum u Kongsan ula iaroh ia ka jingwanrah ia ka jingkylla ha Ialong.
“Nga dap da ka jingkmen ban iohi ia ka jingkhuid bad ia ka jingkylla jong ka Ialong, khamtam ia ki lynti iaid, ki surok bad ka pung ha Aitnar ia kaba ngi lehkmen ia ka Behdeinkhlam man la u snem” ula ong.
U Bah Dhar ula ai ka jingiaroh ia u Myntri Rangbah ka Jylla u Conrad Sangma bad ia u Symbud Myntri Rangbah u Bah Prestone Tynsong kiba la wanrah ia ki kam pynroi ha ka thain bad ula iaroh ruh ia u MLA ka thain u Bah Wailadmiki Shylla uba la tynruh sha ka sorkar ia ki mat kiba iadei bad u paitbah.
Ula kyntu ruh ia ki paitbah ba kidei ban pynneh pynsah bad ban iada ia kine ki jingdon jingem kiba thymmai.
“To nang iai kiew shaphrnag katba nang mih ki snem bad to ai ba ka jingkiew kan pynsuhthied ia ka jingieid ka jong phi ia la ka niam bad ia la ka kolshor tynrai” ula ong ia ki riewngeit jong ka niamtre.
Katba u Myntri ka Koit ka Khiah u Bah Wailadmiki Shylla, kum u kongsan symbud ula ong ba ka jingshna pynbha ia ka pung kam long shuh kaba dap da ka ktieh.
“Mynshwa kane ka pung ka long kaba btuid bha. Mynta u snem kam don ktieh shuh namar ba kala wan ka kam pynroi. Ka Ialong ka dei hok ban ioh ia kane” ula ong bad ka kyntu ia ki nongshong shnong ba kin iarap ban pynneh pynsah ia kine ki jingtei.
Ha kane ka jingialang la donlang ruh ki nongialam na ka JHADC, ki Dolloi bad ki nongialam niam.
