Shillong, Nailar 07 : Ka Meghalaya kala sdang ia ka project wadbniah kaba la angnud baroh shikatta, ban lap ia ka pateng tynrai bad ka jaka ba ki Jaidbynriew trai muluk ka Jylla ki wan da kaba pyniasoh lang ia ki khana pateng bad ka jingwad jingtip ia kiei kiei kiba rim ba jah, ka ktien ka thylliej bad ka jingwadbniah ia ka snam tynrai.
U Myntri Rangbah Conrad K Sangma ha ka sngi Thohdieng, ula shong bishar kam halor ka jingiaid ka project “Wad ia ki Tynrai” (Tracing the Roots), ka project ba nyngkong eh jong ka Tnad Arts & Culture ban tei ia ka sakhi kaba khlain bad kaba bniah halor ka pateng jong ki jaidbynriew trai muluk ka Meghalaya.
Reviewed the progress of ‘Tracing the Roots’, a landmark initiative to document and understand Meghalaya’s rich indigenous history, languages, cultures and heritage.
Through multidisciplinary research, oral traditions, Indigenous Knowledge Systems and modern scientific methods,… pic.twitter.com/dancutvvTs
— Conrad K Sangma (@SangmaConrad) August 7, 2026
Ka project ka thmu ban pyndap ia ki jingduna ha ki jingthoh shaphang ka histori ka Jylla da kaba buh jingthoh ia ki jingia thuh ia ki khana pateng, ki jingstad tynrai ki trai muluk, ki bor treikam nala tynrai, ki tamasa, ki kolshor bad ka jingim ka ktien ka thylliej, haba pynrung ia ki ha ki kor digital na ka bynta ki pateng ban dang wan.
Ym kum ka jingwad bniah ba ju leh halor ka history, kane ka sienjam kan wanrah lang ia ki historian, ki archaeologists, anthropologists, linguists bad kiwei ki riewshemphang ba kin wadbniah ia ka thymmei bad ka jingkrih shnong jong ki jaidbynriew trai muluk ha ki por ba mynshuwa.
Kum shibynta jong kane ka sienjam, la buh ruh ia ka rynsan digital ba kyrpang ban pynrung ia ki jingthoh halor ki jingshem kiba la lap katba nang iaid ka jingwad bniah, ban pynneh pynsah ia ki lad jingtip bad khot iashimbynta lang ki paidbah ha shilynter jong ka project.
Ki Ophisar kila pyntip ba ki jingpynkhreh mynta kila nang iaid naduh u bnai Rymphang, kynthup ka jingthung ia ka Kynhun leh Research bad ka jingpynwandur ia ka rukom pyntrei ia ka project. Kane ka sienjam kan kynthup ia ka jingiatrei lang bad ki jaka pule ba pawnam ka Ri bad Bar Ri ba kin ianujor shaphang ki histori, ka ktien thylliej bad ka kolshor.
Haba bishar ia ka jingiaid ka project, u Conrad ula ong ba kane ka sienjam ka thmu ban wanrah ia ka jingsngewthuh kaba khlain ia ka mynnor jong ki jaidbynriew trai muluk ka Jylla haba iada ruh ia ki khana pateng ba shu iathuh da ka ktien bad ka kolshor kaba la ai pateng na kawei ka pateng sha kawei pat.
