Pynbna ka Congress ban iaid rally ha Shillong ban pyrshah ia ka FCRA Amendment

Shillong, Nailar 07: Ka Meghalaya Congress kala pynbna ban pynlong ïa ka jingïaid paidbah ha ka sngi Nyngkong ha nongbah Shillong ban pyrshah ïa ka jingthmu pynkylla ïa ka Foreign Contribution Regulation Act (FCRA) haba maham ba kane ka lah ban ktah ïa ki jaka pule ba la pynïaid da ki kynhun niam bapher bapher ha kylleng ka thaiñ shatei lammihngi.

U President ka BCC Laitumkhrah, u Eugene Jarain u la ong baka jingthmu ban pynkylla iaka FCRA, ka dei ka mat kaba thmu ban ialeh pyrshah iaki kam shakri paidbah ba pyniaid bad bei tyngka daki kynhun niam bapher bapher kaba donkam ia ka jingshimkhia jong ki paidbah.

“Ka sorkar BJP ka dang pynkhreh ban mynjur ia ka jingpynkylla ia ka FCRA ha kano kano ka por. Ban mynjur ia kane ka ain ka donkam tang 10% ka jingwan ki MP hapoh ka iing dorbar, bad tang palat 50% na kiba don ban thep vote,” la ong u Bah Eugene.

U Bah Eugene ula ong ba ki jaka pule kiba la pynwan dur ia ka pule puthi bad ka koit ka khiah ha ka thain ki don ha ka jingma.

“Shibun ki briew ha ka thain shatei lammihngi ki la shah hikai ha ki skul Missionary bad bun ngut la kha ha ki hospital ba pyniaid ki Missionary. Kine ki jaka pule kiba la kyntiew iaka imlang sahlang jong ngi mynta ki ieng ha ka jingma hapoh kane ka jingpynkylla kaba la tyrwa da ka sorkar NDA,” u la ong.

Kane ka jingiaid paidbah kan sdang naduh ka por 11 baje mynstep jong ka sngi Nyngkong na Fire Bridge shaduh Don Bosco Square Laitumkhrah.

“Kan long ka jingiaid paidbah kaba jar jar, kaba suk. Kan ym don kano kano ka jingpynkhihwin. Ki nongkren kin don ban batai ia ki kyndon jong ka jingpynkylla sha ki paidbah” ula ong.

U la kyntu ia ki nongshong shnong ban pule hi dalade ia ka Bill.

“Leit online, leit sha ka Google, peit ia ki platform AI. Peit kaei kaba ka jingthmu pynkylla ka ong bad kaei ka kyntien. To long kiba tip bad long kiba la pynkhreh,” u la ong.

U Bah Eugene u la pynshai ba ka jingiakhih kam dei satia ka kam politik.

“Kane ka dei ka mat na ka bynta baroh. Haduh 70-80 snem naduh ba la ioh ia ka jinglaitluid ngi la shaniah ha kine ki skul, ki hospital bad ki shlem shakri paidbah. Ki paidbah ki dei ban pule bniah ia kane ka kam bad sngewthuh shano kane ka leit,” u la bynrap.