Shillong, Nailar 07 : Ka kynhun ki Nongialam ka Synjuk Ki Nongsynshar Shnong Ka Bri U Hynniewtrep ha ka sngi Thohdieng, kila kyrpad ia ka Sorkar jylla ban tuklar lem ha kaban nym pynlong ain ia ka “ Khasi Hills Autonomous District (Regulation and Administration of Land) Amendment Bill, 2026”.
Ka Synjuk kala buh ia kane ka jingkyrpad hakhmat u Myntri Rangbah Conrad K Sangma, bad Symbud Myntri Rangbah ba khmih ia ka District Council Affairs, Bah Prestone Tynsong. Kala aiti ruh ia ka dorkhas bad ka jingpynbna (notification) ba iadei bad ka jingbuh pud ia ka jingdon jaka.
Ha ka dorkhas, ki nongialam kila iathuh ba ka KHADC, ha ka dorbar ba long ha u bnai Jylliew 2026, kala mynjur ia ka Amendment Bill, 2026.
Ka Amendment ka weng noh ia ka kyndon ha ka kyndon 16 jong ka Principal Act, 2021, kaba donkam ia ka Executive Committee ban iasyllok bad ki Dorbar Shnong, Dorbar Raid bad Dorbar Hima hashuwa ba kin buh ia u pud halor ka jingiapynbeit jaka, jingai bynta bad pynbynta kyrpang ia ka jaka ka Raid.
Ka kynhun kala pynpaw ia ka jingsngewkhia ba kane ka amendment kan pyntlot noh ia ka bynta jong ki bor treikam nala tynrai kiba don, da ki pateng la pateng, kiba treikam kum ki nongri nongsumar ia ka synshar khadar nala tynrai.
Ki Khlieh Nongsynshar kila iapynlong lang ia ka jingialang ha Shillong ha ka 7 tarik Naitung, 2026, kaba la shim ia ka rai ba iamynjur lang, ban pyrshah ia ka Bill.
Ka kynhun kala pynpaw ba :
1. Ka bill ka iaid pyrshah ia ka jingmut jong ka Principal Act bad ka Khasi customary land tenure system ne ka riti bat khyndew nala tynrai u Khasi.
2. Ka pyntlot ia ka nongrim jong ka jingiatreilang bad ki bor Sorkar bad ka jingkhanglad ia ka synshar paidbah ba shaniah ha kawei ka bor
3. La mynjur ruh ia ka khlem ka jingiasyllok bad ki Dorbar Shnong, Dorbar Raid bad Dorbar Hima.
Kila kdew ruh ia ka KHADC Order No. DCRBF/13/465/2026/14/161 bad 11 tarik Jylliew, 2026, kaba buh ia u pud halor ka jaka raid khlem da bud ia ka lynti ban iasyllok kumba la pruid dak ha ka kyndon 16.
Ka kynhun kala pynpaw baka notification ka long kaba leh be-ain bad ka lah ban lam ia ka jingkulmar jingmut ha u paidbah.
U Myntri Rangbah ula iai ban ia ka jingkut jingmut jong ka Sorkar ban iada ia ki bor tynrai nala tynrai, ka synshar khadar nala tynrai, ka hok jong ki trai muluk halor ka jaka puta bad ka jingai pateng kaba pher bha-kaba leit sha ka Kmie ha Meghalaya.
Ka kynhun kala pynpaw ia ka jingsngewnguh ia kane ka jingiakren kaba ai mynsiem.
 Amendment Bill, 2026”.){kind=link}