Shillong, Nailar 07: Ki bor district East Khasi Hills, ka la khang pyrshah ia ki kali ba heh bad kali kamai ba kin ieng ne sangeh shipor ha ki rud surok bah (National Highways) bad kane ka hukum kan treikam noh mardor.
Ha ka hukum ba la pynmih da u District Magistrate Abhilash Baranwal, u la ong ba ïa kane ka rai la shim katkum ka jingbthah jong ka Supreme Court ha ka 13 tarik Iaiong 2026, kaba ong ba ki kali ki lah ban sangeh tang ha ki jaka ba la ithuh kyrpang ban ieng, ki lay-byes lane ha ki Wayside Amenities.
Ki bor district kala kdew ba ki trok bad kiwei kiwei ki kali kamai ki ju pynïeng katba lap bas hem ha ki rud surok jong ki National Highway ha ka distrik, kaba la wanrah ïa ka jingkhapngiah bad ka jingma ïa ka jingshngaiñ jong ki paidbah.
Da kaba kdew ïa ka jingkyrkieh jong kane ka kam, ïa kane ka hukum la pynmih katkum ka kyndon 163 jong ka Bharatiya Nagarik Suraksha Sanhita, 2023.
Katkum katei ka hukum, kino kino kiba pynkheiñ kin ngat ha ka jingpynshitom katkum ka kyndon 223 jong ka Bharatiya Nyaya Sanhita, 2023, ryngkat bad ki kyndon jong ka Motor Vehicles Act, 1988.
Ka hukum kan neh haduh ar bnai bad yn wad ia ki jingpynbna paidbah ha ki thanat bad haki transport check-gates ba don haki surokbah.
Kane ka jingbthah ka wan kum shi bynta ban pyntreikam ïa ki kyndon ïada haki surok bad ban pynthikna ban nym shah pynthut ka jingiaid ki kali ha ki surok National Highways kiba ïaid lyngba ka East Khasi Hills.
 bad kane ka hukum kan treikam noh mardor.){kind=link}