Shillong, Nailar 05 : U Myntri Rangbah ka Jylla Conrad K Sangma ha ka sngi Balang ula ong ba ka Sorkar Jylla kam shym la khang ia ka jingkhang ban iakren bad kyntu ia ka Voice of the People Party (VPP) ba kan pyndonkam ia ka Iingdorbar Thaw Ain kum ka rynsan kaba biang eh ban kren ia kino kino ki jingeh.
Kane ka jingkynthoh kala mih kum ka jubab ia ka rai jong ka VPP ban tur paidbah jai jai sha Secretariat ha ka sngi Palei, 6 tarik Nailar, halor ka jingkynnoh ba ka Sorkar kam shym la leh eiei halor ki 10 tylli ki mat ka party.
Haba kren sha ki lad pathai khubor, u Conrad ula ong ba ka Sorkar ka long beit kaba kloi ia kano kano ka jingiakren.
“Ngi long beit kiba kloi ia kano kano ka jingiakren. Ngi la ju kren na ka por sha ka por ia kane ba lada don kano kano ka jingeh, ngi long kiba kloi ban iakren kam pher ka dei ia kano kano ka kam” ula ong.
U Myntri Rangbah ula bynrap ba ka riti synshar paidbah ka bthah ba ia kum kine ki kam dei ban rah iakren ha Iingdorbar Thaw Ain, ka ban sa shong dorbar shen.
“Kumta, lada phi don ia kano kano ka jingsngewkhia, ka Iingdorbar Thaw Ain ka dei ka rynsan kaba biang. Hynrei lait na kata, kum ka Sorkar ngim ju khang iano iano ruh ban wan iakren. Kumta, lada ki kwah ban don kano kano ka jingiakren, ngi long kiba kloi bad kane ka dei ka nongrim jong ngi” ula ong.
 ba kan pyndonkam ia ka Iingdorbar Thaw Ain kum ka rynsan kaba biang eh ban kren ia kino kino ki jingeh.){kind=link}