Kohima, Nailar 4: U slap ba khlem sangeh u la pynthut ia ki bynta kiba heh jong ka Nagaland ha district Tuensang, ha kaba ka jingtwa khyndew ka la pynthut ia ka surok National Highway-202 bad pynthut ia ka jingpyniasoh surok sha Shamator bad Noklak, ha kaba la ktah ym duna ia ka 63 tylli ki longiing, la ong ka bor pyniaid district ha ka sngi Ba-ar.
Haba kren sha ki lad pathai khubor, ka Deputy Commissioner bad ka Chairperson jong ka District Disaster Management Authority (DDMA) ka Lithrongla ka la ong ba ka jinghap slap kaba la bteng da ki sngi ka la wanrah ïa ki jingtwa khyndew ha kylleng ka District, kaba la pynthut jur ïa ka jingim kaba man ka sngi.
“Ka jingtwa khyndew ka la wanrah ïa ka jingthut kaba khraw ha ka leit ka wan. Ka jingïaid lynti ha ka National Highway-202, kawei na ki lad jingim jong ka eastern Nagaland, ka la sahkut noh. Ka jingïaid lynti jong ki kali heh kiba kit ïa ki mar ba donkam sha ki distrik Shamator bad Noklak ruh ki la hap sangeh noh,” ka la ong.
Katba ka jinglong jingman ka nang jur, la pynkynriah noh ïa lai tylli ki ophis sorkar, kynthup ïa ka Post Office bad ki ophis kiba don ha ka thaiñ jong ka IOC, kum ka jingïada namar ka jingma jong ka jingtwa khyndew kaba thymmai.
Da ka jingkhanglad jong ki katto katne ki surok bad ka jingïaid lynti ka la shah ktah jur, ka bor pyniaid district ki la ai jingmut ïa ki nongshong shnong ban kiar na baroh ki jingleit jingwan ki bym donkam, khamtam ha ki jaka ba lah ban twa khyndew ha ka NH-202 bad kiwei kiwei ki surok ba la khang, bad ban shong hapoh ïing katba lah haduh ba ka jinglong ka suiñbneng kala kham bha.
Ki heh ophisar ki dang peitngor baroh shisngi ïa ki jaka kiba lah ban shah ktah katba u slap u dang bteng, kaba la pynmih ïa ka jingsngewkhia halor ki jingthut ba thymmai jong ki slope bad ki jingshah khang surok.
Ka Deputy Commissioner ka la ai khublei ïa u Myntri Rangbah ka Jylla u Neiphiu Rio bad ïa ka Nagaland State Disaster Management Authority (NSDMA) na ka bynta ka jingkyrshan bad jingïarap kaba kloi ban pynduna ïa ka jingktah jong kane ka jingshah lyngshop.
Ka jingslap kaba khlem pyni ia ki dak ki shin ban kham jem, ki bor pyniaid ki la kyrpad ïa ki paidbah ban long kiba husiar bad ban ïatreilang bad ki jingai jingmut ban ïada, da kaba maham ba ka jingma jong ka jingtwa khyndew shuh shuh ka dang jur ha ki sngi ban wan.
