Shillong, Nailar 4: The Khasi Students’ Union kala aipor 7 sngi ia ka Tnad Urban Affairs ban pynshai halor ki jingkynnoh ia ka jingbym ai jingbit ban tei ia ka jaka mane Blei hapoh ka ophis jongka CBI bad Residential Complex ha Mawdiangdiang bad ka byrngem lada pulom ha kaban ai jubab, ka seng kan shim ia ka aiñ ha la ki jong ki kti.
Hadien ka jingialang bad u Director jong ka Tnad Land and Revenue bad ka jingiakynduh ia u Director ka Tnad Urban Affairs hynne ka sngi, ka KSU kala phah ia ka kyrwoh ban pyntip ba ka Tnad Land and Revenue kam don bynta eiei ha kaban aiti ia ka jaka na ka bynta ka projek jong ka CBI bad ia katei ka kam baroh la pyniaid da ka Tnad Urban Affairs.
Ha ka jingialang bad ka u Director ka Urban Affairs Director, ka KSU kala pynpaw ia ka jingsngewkhia ban tip ba ia katei ka jaka la ai thik na ka bynta ban tei ia ka ophis jong ka CBI bad ia ka Residential Complex.
Ka seng kala buh jingkylli ia ki kot ki sla baroh ne ‘Blueprint’ jong katei ka projek la ka kynthup ia ka jingai jingbit ban tei ia ka Temple ha ka kyrpong jong ka ophis sorkar.
U Director ula pynthikna ia katei ka kynhun ban leit jurip ia katei ka jaka, hynrei ka KSU kala dawa ba dei ban ai jingpynshai da ka jingthoh na ka Tnad hapoh jong ka 7 sngi.
Ka seng kala pynpaw ba kano kano ka jingtei kaba be-aiñ ha katei ka jaka dei ban pynpra noh, kumba la leh ia kino kino ki jingtei ki bym shim la ioh jingbit ban tei. Kala maham ba kano kano ka jingbym shimkhia kan pynlong ban shim ia ki lad ban tuklar hi dalade.
